BDU-da “Tarixin Heydər Əliyev zirvəsi” adlı tədbir keçirilib
“Heydər Əliyev İli” çərçivəsində Bakı Dövlət Universitetində Yeni Azərbaycan Partiyasının (YAP) Yasamal rayon təşkilatı və “Z.Xəlilov küç.33” (BDU) ünvanı üzrə ərazi partiya təşkilatı ilə birgə “Tarixin Heydər Əliyev zirvəsi” adlı tədbir keçirilib.
Tədbirdə YAP Yasamal rayon təşkilatının sədri Bəxtiyar Nəbiyev, Milli Məclisin üzvləri - partiyanın Təftiş komissiyasının üzvü Naqif Həmzəyev, Jalə Əliyeva, BDU-nun Biologiya fakültəsinin dekanı Afət Məmmədova, “Z.Xəlilov küç.33” (BDU) ünvanı üzrə ərazi partiya təşkilatının sədri Zahid Cəfərov, professor-müəllim heyəti və tələbələr iştirak edib.
Əvvəlcə Dövlət himni səsləndirilib, sonra Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Tədbiri giriş nitqi ilə açan “Z.Xəlilov küç.33” (BDU) ünvanı üzrə ərazi partiya təşkilatının sədri Zahid Cəfərov bildirib ki, Ulu Öndər Heydər Əliyevin xalqı və dövləti qarşısındakı misilsiz xidmətləri Azərbaycan tarixinin şanlı səhifələrini təşkil etməkdədir. Millətinin və dövlətinin ali mənafeyini öz fəaliyyətində daim təməl prinsip kimi qəbul edən Ümummilli Liderimiz bugünkü müstəqil Azərbaycanın memarıdır. Ümummilli Lider bütün mənalı həyatı və şərəfli dövlətçilik fəaliyyəti müddətində yalnız Azərbaycanı düşünüb, onun müasirləşməsinə, qüdrətlənməsinə çalışıb.
YAP Yasamal rayon təşkialtının sədri Bəxtiyar Nəbiyev qeyd edib ki, Ulu Öndər Heydər Əliyevin həm SSRİ dönəmində, həm də müstəqillik illərində ölkəmizə rəhbərliyi zamanı xalqın rifah halının daha da yaxşılaşdırılması, respublikamızın tərəqqisinin təmin olunması və digər istiqamətlərdə tarixi əhəmiyyətə malik misilsiz işlər görülüb. Bu gün müasir, müstəqil Azərbaycan Ulu Öndərin ideyaları əsasında inkişaf edir. Ümummilli Liderin əsasını qoyduğu siyasət Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bu siyasətin şah əsəri Müzəffər Ali Baş Komandan İlham Əliyevin rəhbərliyi ilə Vətən müharibəsində rəşadətli Ordumuzun Qarabağı düşmən tapdağından azad etməsi və regionda yaranan reallıqlardır. Ölkəmiz Prezident İlham Əliyevin rəhbərliyi ilə Zəfərimizi doğuran siyasi-diplomatik və hərbi kursu uğurla davam etdirmiş, bu ilin sentyabr ayının 19-da start verilmiş antiterror tədbirləri üçün baza formalaşdırmışdı. Azərbaycan lokal antiterror əməliyyatı ilə Qarabağ iqtisadi rayonunda olan separatizm yuvasını darmadağın edərək, suverenliyimizi bərpa etdi. Oktyabrın 15-də isə Xankəndi və digər ərazilərimizdə Müzəffər Ali Baş Komandanın bayrağımızı uzaltması tarixi Zəfərimizin zirvəsi oldu.
Milli Məclisin üzvləri – YAP Təftiş komissiyasının üzvü Naqif Həmzəyev və Jalə Əliyeva çıxışlarında qeyd ediblər ki, Ümummilli Lider milli dövlətçilik ideyalarını hər şeydən üstün tutub. Azərbaycanın dövlətçilik ənənələrinin bərpa edilib zənginləşdirilməsi, müstəqilliyinin əbədi, dönməz xarakter alması, iqtisadi inkişaf yolu ilə inamla irəliləməsi, beynəlxalq nüfuzunun sürətlə artması Ulu Öndərin səmərəli fəaliyyəti sayəsində mümkün olub.
BDU-nun Biologiya fakültəsinin dekanı Afət Məmmədova isə vurğulayıb ki, XX əsrin axırlarında yenidən müstəqillik qazanan Azərbaycan Respublikasının mövcudluğu və dünyanın sürətlə inkişaf edən dövlətlərindən birinə çevrilməsi Ümummilli Liderin tarixi fəaliyyətinin nəticəsidir. Ulu Öndərin alternativi olmayan daxili və xarici siyasəti bu gün onun siyasi varisi, Azərbaycan Respublikasının Prezidenti İlham Əliyev tərəfindən uğurla davam etdirilir.
Çıxışlardan sonra rayonun ictimai-siyasi həyatında fərqlənən bir qrup partiya fəalına fəxri fərmanlar təqdim edilib. Tədbirə YAP-ın himninin səsləndirilməsi ilə yekun vurulub.
