“Təhsil haqqında” Azərbaycan Respublikasının Qanununun müvafiq müddəalarına əsasən Azərbaycan Respublikasında hüquqi şəxs kimi dövlət qeydiyyatına alınmış, fəaliyyətinə lisenziya verilmiş və akkreditasiya olunmuş təhsil müəssisəsinin fəaliyyətinə hüquqi təminat verilir. Təhsil müəssisəsinin akkreditasiyası təhsil müəssisəsinin fəaliyyətinin qəbul olunmuş dövlət təhsil standartlarına və digər normativ hüquqi aktların tələblərinə uyğunluğunun yoxlanılması məqsədi ilə aparılır və təhsil müəssisəsinin statusunun, hər bir ixtisas (proqram) üzrətəhsilalanların say həddinin müəyyən edilməsi, onun fəaliyyətinin növbəti müddətə uzadılması üçün hüquqi təminat yaradır. Təhsil müəssisəsinin akkreditasiyası Təhsildə Keyfiyyət Təminatı Agentliyi tərəfindən 5 ildən bir həyata keçirilir.
İnstitusional akkreditasiya təhsil müəssisəsinin ümumi fəaliyyətinin qəbul olunmuş dövlət təhsil standartlarına, digər normativ hüquqi aktların tələblərinə uyğunluğunun yoxlanılması məqsədilə aparılır və təhsil müəssisəsinin statusunun müəyyən edilməsi, hər bir ixtisas üzrə kadr hazırlığı potensialının, təhsilalanların say həddinin müəyyənləşdirilməsi və müəssisənin fəaliyyətinin növbəti müddətə uzadılması üçün hüquqi təminat yaradır.
Azərbaycan Respublikası Nazirlər Kabinetinin müvafiq Qərarı ilə təsdiqlənmiş “Təhsil müəssisələrinin akkreditasiyası Qaydaları”nın müvafiq müddəalarına uyğun olaraq beynəlxalq akkreditasiya xarici keyfiyyət təminatı qurumu tərəfindən hazırlanmış qayda və meyarlar əsasında keçirilən təhsilin keyfiyyətinə təminat yaradan prosedurdur. Müəyyən olunmuş qaydalar çərçivəsində beynəlxalq səviyyədə akkreditasiya olunan təhsil proqramının nəticələri dövlət akkreditasiyası üçün nəzərə alınır.
BDU-NUN İNSTİTUSİONAL AKKREDİTASİYASI
Bakı Dövlət Universiteti Azərbaycan Respublikası Elm və Təhsil Nazirliyinin Akkreditasiya Şurasının 8 iyun 2023-cü il tarixli qərarı ilə 5 (beş) il müddətinə institusional akkreditasiyadan keçmişdir.
BDU-NUN BEYNƏLXALQ PROQRAM AKKREDİTASİYASI
Bakı Dövlət Universiteti ali təhsil pilləsinin magistratura səviyyəsinin 6 ixtisaslaşması (Qeyri-üzvi kimya, Fiziki kimya, Analitik kimya, Üzvi kimya, Yüksəkmolekullu birləşmələr kimyası, Neft kimyası) üzrə Qazaxıstanın Təhsildə Keyfiyyətin Təminatı üzrə Müstəqil Agentliyi (IQAA) tərəfindən 5 (beş) il müddətinə beynəlxalq proqram akkreditasiyadan keçmişdir. Azərbaycan Respublikası Elm və Təhsil Nazirliyinin Akkreditasiya Şurasının 20 sentyabr 2023-cü il tarixli qərarı ilə beynəlxalq proqram akkreditasiyalarının nəticələri dövlət akkreditasiyası üçün nəzərə alınmışdır.
Beynəlxalq proqram akkreditasiyası nəticələrinə dair müvafiq hesabatlarla tanış olmaq üçün klikləyin.
