Fevralın 22-də tanınmış riyaziyyatçı, görkəmli alim, Azərbaycan Milli Elmlər Akademiyasının (AMEA) müxbir üzvü, Bakı Dövlət Universitetinin (BDU) Tətbiqi Riyaziyyat Elmi Tədqiqiat İnsitutunun elmi işlər üzrə direktor müavini, fizika-riyaziyyat elmləri doktoru, professor Vaqif Quliyevin 65 yaşı tamam olur.
Quliyev Vaqif Sabir oğlu 1957-ci il fevralın 22-də Salyan rayonunda anadan olmuşdur. 1978-ci ildə Azərbaycan Dövlət Universitetinin Mexanika-riyaziyyat fakültəsini fərqlənmə diplomu ilə bitirmişdir. 1983-cü ildə fəlsəfə doktoru, 1994-cü ildə elmlər doktoru elmi dərəcəsini (V.A. Steklov adına Riyaziyyat institutu, Moskva ş.), 1997-ci ildə professor elmi adını almış, 2014-cü ildə AMEA-nın müxbir üzvü seçilmişdir.
1994-cü ildə 37 yaşlı azərbaycanlı alim Moskva şəhərinin V.A. Steklov adına Riyaziyyat İnstitutunun ixtisaslaşdırılmış müdafiə şurasnda «Интегральные операторы в пространствах функций на однородных группах и на областях в» mövzusunda doktorluq dissertasiyasını uğurla müdafiə edib fizika-riyaziyyat elmləri doktoru elmi dərəcəsini alır. Onu da qeyd edək ki, V. Quliyev dünyanın bu mötəbər riyaziyyat məktəbində 70 illik sovetlər dönəmindən indiyədək elmi iş müdafiə edib elmlər doktoru alimlik dərəcəsi alan beş azərbaycanlı alimin beşincisidir.
Vaqif Quliyev Azərbaycan elminin dünya səviyyəsində tanıdılması istiqamətində yorulmadan çalışır, dünya riyaziyyat elminə töhfələr verir. Ona bu işdə institutumuzun əməkdaşları adından uğurlar arzulayıb, zehniniz, yolunuz daim açıq olsun deyirik.