BDU-da “Müasir linqvistik paradiqmalar” mövzusunda elmi seminar
Bakı Dövlət Universitetinin (BDU) Filologiya fakültəsinin təşkilatçılığı ilə 27 mart – Azərbaycan Respublikasında “Elm günü”nə həsr olunmuş “Müasir linqvistik paradiqmalar” mövzusunda elmi seminar keçirilib.
Seminarda Azərbaycan Dillər Universitetinin Ümumi dilçilik kafedrasının müdiri, filologiya elmləri doktoru Azad Məmmədov məruzə ilə çıxış edib.
Filologiya fakültəsinin dekan müavini Anar Fərəcov bildirib ki, müasir dövrdə dilçilik elmi sürətlə inkişaf edir və yeni yanaşmaların, xüsusilə müasir linqvistik paradiqmaların öyrənilməsi bu sahədə aparılan elmi araşdırmalar üçün böyük əhəmiyyət daşıyır.
Çıxış zamanı məruzəçi Azad Məmmədov müasir linqvistik paradiqmalar kontekstində sosiolinqvistikanın roluna toxunub. O qeyd edib ki, dil və cəmiyyət arasındakı münasibətlərin öyrənilməsi dilin yalnız struktur deyil, eyni zamanda funksional və sosial tərəflərinin araşdırılmasını zəruri edir. Azad Məmmədov vurğulayıb ki, insanların dildən istifadə məqsədləri, ünsiyyət strategiyaları və dil bacarıqları sosial təsir mexanizmlərinin formalaşmasında mühüm rol oynayır.
Məruzədə dilin cəmiyyət daxilində təsir və yönləndirmə vasitəsi kimi çıxış etməsi, eləcə də dil vasitəsilə manipulyasiya imkanları məsələləri diqqətə çatdırılıb. Bildirilib ki, sosiolinqvistika çərçivəsində bu proseslərin funksionalizm yanaşması əsasında tədqiqi daha dolğun nəticələr əldə etməyə imkan verir.
Çıxışçı qeyd edib ki, hazırda sosiolinqvistik tədqiqatlarda funksional yanaşmaya kifayət qədər yer verilməməsi bu sahədə yeni elmi istiqamətlərin formalaşdırılmasını zəruri edir. Bu baxımdan formalizm və funksionalizm paradiqmalarının müqayisəli şəkildə araşdırılmasının əhəmiyyəti vurğulanıb.
Seminar müzakirələrlə davam edib və iştirakçıları maraqlandıran suallar cavablandırılıb.
