AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) bu il Prezident təqaüdünə layiq görülən 15 tələbəsi arasında Filologiya fakültəsinin I kurs tələbələri Aydan Rəcəbova və Firanə Şahverdiyeva da var. Onlar ortaq uğur hekayələri ilə seçilirlər. Dörd yaşından başlayan dostluq, eyni parta arxasında keçən məktəb illəri, üçqat olimpiada qalibiyyəti, BDU-da kəsişən tələbəlik yolları və Prezident təqaüdünün birgə sevinci... Birlikdə qurduqları xəyalları reallığa çevirən və bu gün ölkənin ən ali tələbə təqaüdünü qazanan iki gəncin müsahibəsini təqdim edirik:

– Uşaqlıq, məktəb, hazırlıq dövrü və nəhayət, tələbəlik... Bu qırılmaz bağ necə yarandı?

Aydan: Bizim dostluğumuz 4 yaşımızdan başlayır. Hətta o günün tarixi də dəqiq yadımızdadır – 12 oktyabr idi, atalarımız vasitəsilə tanış olduq. Firanə o gün mənə nar gətirmişdi. Ondan sonra, sözün əsl mənasında, bir yerdə böyüdük; sinif yoldaşı, hazırlıq yoldaşı olduq. BDU-da oxumağı isə həmin dövrlərdən bərabər arzulamışıq. İndi də həm tələbə yoldaşıyıq, həm də Prezident təqaüdçüsü.

Firanə: Həvəsdən düşəndə həmişə bir-birimizi motivasiya edirdik. Qarşımıza ən yüksək nəticə göstərməyi hədəf qoymuşduq və inanırdıq ki, bunun öhdəsindən birlikdə gələcəyik. Beləcə, bir-birimizə suallar verib, dərslərimizi bərabər öyrənirdik. Hər ikimiz Respublika fənn olimpiadalarının üçqat qalibi olduğumuz üçün universitetə müsabiqədənkənar qəbul olmaq şansımız var idi. Amma qarşımıza məqsəd qoyduq ki, blok imtahanlarında mütləq iştirak edib "Prezident təqaüdçüsü" adını birlikdə alacağıq.

– Bəs bu ada layiq görüldüyünüzü öyrəndiyiniz an hansı hissləri keçirdiniz?

Firanə:  Xəbəri mənə zəng edib dedilər və elə telefondaca sevincimdən ağlamağa başladım. Qəbul cavablarımız çıxanda çox təəccüblənmədik, çünki aşağı-yuxarı qəbul olduğumuzu onsuz da bilirdik. Amma müəllimlərimiz təqaüdə düşmək üçün balımızın riskli olduğunu deyirdilər. Buna görə də Prezident təqaüdünə layiq görüldüyümüzü biləndə hisslərimiz tam fərqli oldu.

Aydan:  Xəbəri öyrənəndə evdə deyildim. O an necə sevindiyimi, nələr hiss etdiyimi sözlə ifadə etmək çox çətindir. Bütün o yuxusuz gecələrin, olimpiada həyəcanlarının və fasiləsiz dərslərin bəhrəsini gördük. Ən əsası da, uşaqlıqdan bəri eyni xəyalı paylaşdığım insanla – Firanə ilə eyni siyahıda adımı görmək sevincimi ikiqat artırdı. Biz bu çətin yola birlikdə çıxmışdıq, nəticəni də birlikdə qeyd etmək ən gözəl mükafat oldu.

– İxtisas seçiminə gələk. Niyə məhz “Azərbaycan dili və ədəbiyyatı müəllimliyi”?

Aydan:  Bu, mənim uşaqlıq arzum olub. Həmişə nəsə öyrənməyə və bildiklərimi başqaları ilə bölüşməyə böyük həvəs göstərmişəm. Uşaq vaxtı aramızda həmişə "müəllim-müəllim" oynayardıq. Əlimizdə təbaşir, marker, sanki əsl müəllim idik. Əsas istiqamət isə fənn olimpiadalarından sonra qətiləşdi. Mən də həmişə öz-özümə deyirdim ki, artıq düşünməyə ehtiyac yoxdur, sənin yolun çoxdan bu sahədə açılıb. Məhz bu ixtisası seçməyimizin əsas səbəbi isə ana dilimizin lüğət tərkibi, qrammatikası və tədris metodikası ilə bağlı məqamları dərindən öyrənmək, dilimizi daha da inkişaf etdirmək istəyimizdir. Hətta artıq o məqama gəlib çatmışıq ki, adi oxucu kimi bədii ədəbiyyat oxuya bilmirik. Hər şeyə tədqiqatçı kimi yanaşır, bilmədiyimiz söz olanda dərhal araşdırıb qeydlər aparırıq. Artıq sadəcə zövq üçün yox, həm də öyrənmək və öyrətmək üçün oxuyuruq.

Firanə: Mənim bu ixtisasa marağımın yaranması idealım olan anamla bağlıdır, o da Azərbaycan dili və ədəbiyyatı müəllimidir. Mən daim əlində kitab olan və çox mükəmməl hesab etdiyim bir qadınla birgə böyümüşəm. İndi onunla eyni adı, eyni peşəni daşıyacağım üçün çox qürurluyam. İxtisas seçimi ilə bağlı ailəmiz tərəfindən bizə heç bir təzyiq göstərilməyib. Elə bu sərbəstliyə görə istədiyimiz sahəni cəsarətlə seçə bildik. Ətrafdan, cəmiyyətdən "başqa ixtisas seçin" deyə çox təkid edənlər olurdu. Lakin buna görə arzumuzdan əl çəkmək istəmədik. Əsas məsələ insanın özünü harada, necə görməsidir. Mən özümü ancaq müəllim kimi görürdüm. Başqa ixtisas seçmək içimizdə bu peşənin sevgisini öldürmək demək olardı.

– Niyə məhz BDU-nu seçdiniz?

Firanə:  Abituriyent vaxtı otağımın hər yanı BDU-nun şəkilləri ilə dolu idi. Mənim üçün ən böyük motivasiya qaynağı otağıma asdığım BDU logoları, şəkilləri və burada oxumaq arzusu idi. Universitetin sosial media səhifələrini izləyir, daim burada tələbə olmağın xəyalını qururdum. BDU-da tələbə həyatı yaşamaq mənim üçün tamam başqa bir arzu idi.

Aydan: BDU-nu seçməyə IX sinifdən sonra qərar vermişdim. Dəqiq qərarım isə Respublika fənn olimpiadası qaliblərinin mükafatlandırılması mərasimindən sonra formalaşdı. Xatırlayıram ki, sonuncu mərasim elə BDU-da keçirilmişdi. Universitetlə, korpuslarla ilk dəfə o gün yaxından tanış oldum. Onda anladıq ki, bu universiteti istəməyimiz heç də təsadüfi deyil. İxtisas seçimi zamanı heç bir dilemma qarşısında qalmadıq, qərarımızdan bir an belə şübhələnmədik. Beləcə ölkənin flaqman universitetinin ən qədim fakültəsində təhsil almaq şansı əldə etdik.

– İlk təqaüdünüzü necə xərcləyəcəksiniz?

Firanə: İlk təqaüdümlə qrup yoldaşlarıma çay qonaqlığı verəcəyəm.

Aydan: Hələ ki, təqaüdümü necə xərcləyəcəyim barədə düşünməmişəm.

– Bu gün sizin keçdiyiniz o çətin və maraqlı yollardan digər şagirdlər də keçir. Onlara nə demək istərdiniz?

İkisi də birgə: Xəyallarının arxasınca getsinlər...

Hazırladı: Nuran Yaqub