BDU-nun dosenti Məti Osmanoğlunun “Bodenştedt oğdurumu, doğrudurmu?” kitabının elmi müzakirəsi keçirilib
Bakı Dövlət Universitetinin (BDU) Rus ədəbiyyatı tarixi kafedrasının müdiri, professor Ədibə Paşayevanın təşəbbüsü ilə “Xəzər” Muzey Mərkəzində elmi seminar təşkil olunub.
Tədbir BDU-nun Ədəbiyyat tarixi kafedrasının dosenti Məti Osmanoğlunun “Bodenştedt oğdurumu, doğrudurmu?” adlı kitabına həsr olunub. Müzakirələr zamanı əsər “köhnə mövzuya yeni baxış” kontekstində təhlil edilib.
Tədbirdə muzeyin yaradıcısı Səyavuş Əlizadə mərkəzin fəaliyyəti və burada nümayiş etdirilən zəngin eksponatlar haqqında ətraflı məlumat verib. Seminarda kafedranın dosenti Lalə Əfəndiyeva mövzunun aktuallığından bəhs edib, müzakirələrin elmi əhəmiyyətini vurğulayıb. Qeyd olunub ki, kitabda Azərbaycanda uzun müddət “şeir oğrusu” kimi təqdim edilən alman şairi və alimi Fridrix Martin fon Bodenştedtin şəxsiyyəti və yaradıcılığına fərqli prizmadan yanaşılır. Müəllif onun fəaliyyətinin Azərbaycan tarixi və ədəbiyyatı baxımından az öyrənilmiş tərəflərini üzə çıxarır. Bildirilib ki, əsər Bodenştedtin indiyədək diqqətdən kənarda qalmış mətnləri əsasında XIX əsrdə Rusiya imperiyasının Qafqazda apardığı işğalçılıq siyasətinin mahiyyəti barədə geniş təsəvvür yaradır. Bu baxımdan kitab yalnız ədəbi faktların deyil, həm də tarixi gerçəkliklərin yeni interpretasiyası kimi dəyərləndirilib.
Seminarda çıxış edən müəllif Məti Osmanoğlu Bodenştedtin “Qafqaz xalqları və onların ruslara qarşı azadlıq mübarizəsi”, “Şərqdə min bir gün”, “Ləzgi qızı Ada”, “Ömrümdən xatirələr” kimi əsərlərinə diqqət çəkərək bu mətnlərin XIX əsr Qafqazında baş verən ictimai-siyasi və mədəni proseslərdə Azərbaycanın yerinin Avropa oxucusuna çatdırılmasında mühüm rol oynadığını vurğulayıb. O, bu əsərlərin tarixi və filoloji baxımdan yenidən araşdırılmasının aktuallığını qeyd edib və iştirakçıların suallarını cavablandırıb.
Sonda professor Ədibə Paşayeva kitabın Azərbaycan elmi üçün əhəmiyyətini vurğulayaraq bu cür nəşrlərin elmi mühitdə yeni müzakirələrə yol açdığını bildirib. O qeyd edib ki, dəyərli əsərlər zamanın sınağından çıxaraq öz aktuallığını qoruyur.
