BDU-da Tədqiqat, İnkişaf və İnnovasiyalar üzrə Mükəmməllik Akademiyası yaradılıb
Bakı Dövlət Universitetində (BDU) elmi-tədqiqat fəaliyyətinin beynəlxalq standartlara uyğun inkişaf etdirilməsi, elmi potensialın daha səmərəli əlaqələndirilməsi və müasir innovasiya ekosisteminin formalaşdırılması istiqamətində yeni institusional model yaradılıb.
BDU-nun elmi-tədqiqat mərkəz və laboratoriyalarında həyata keçirilən tədqiqatların vahid strateji yanaşma əsasında əlaqələndirilməsi, elmi-tədqiqat infrastrukturunun daha səmərəli idarə olunması və innovasiya fəaliyyətinin sistemli təşkili məqsədilə Tədqiqat, İnkişaf və İnnovasiyalar Mərkəzinin bazasında Tədqiqat, İnkişaf və İnnovasiyalar üzrə Mükəmməllik Akademiyası yaradılıb.
Akademiya BDU-da elmi-tədqiqat, inkişaf və innovasiya fəaliyyətini vahid platformada birləşdirən müasir elmi inkişaf modeli kimi fəaliyyət göstərəcək. Onun fəaliyyəti elmi mükəmməlliyin təşviqinə, texnoloji inkişafın sürətləndirilməsinə, innovativ sahibkarlığın dəstəklənməsinə, elmi nəticələrin praktik tətbiqinə və sənayeyə transferinə yönəldiləcək.
Akademiyanın əsas fəaliyyət istiqaməti BDU-da təbiət və dəqiq elmlər sahələri üzrə fəaliyyət göstərən elmi mərkəz və laboratoriyaların vahid elmi-təşkilati çətir altında əlaqələndirilməsidir. Bu yanaşma ayrı-ayrı elmi istiqamətlər üzrə mövcud potensialın birləşdirilməsinə, laboratoriya və tədqiqat imkanlarından daha səmərəli istifadəyə, birgə elmi layihələrin həyata keçirilməsinə və müxtəlif elm sahələrinin kəsişməsində multidisiplinar tədqiqatların genişləndirilməsinə şərait yaradacaq.
Fizika, kimya, biologiya, riyaziyyat, kompüter elmləri və digər əlaqəli sahələr üzrə fəaliyyət göstərən tədqiqatçıların əməkdaşlığının gücləndirilməsi kompleks elmi problemlərin multidisiplinar yanaşma əsasında öyrənilməsinə, müxtəlif elmi istiqamətlər üzrə bilik və təcrübənin birləşdirilməsinə, eləcə də yeni elmi nəticələrin əldə olunmasına imkan verəcək.
Mövcud mərkəz və laboratoriyalar öz ixtisaslaşmış elmi fəaliyyətlərini davam etdirməklə yanaşı, Akademiya çərçivəsində ortaq tədqiqat prioritetləri, multidisiplinar layihələr və birgə elmi təşəbbüslər üzrə əməkdaşlıq edəcəklər. Beləliklə, BDU-nun mövcud elmi potensialının vahid platformada əlaqələndirilməsi tədqiqat fəaliyyətinin miqyasının, keyfiyyətinin və səmərəliliyinin artırılmasına xidmət edəcək.
Akademiyanın strukturunda Beynəlxalq qrant və layihələr Mərkəzinin, həmçinin mövcud Texnologiyaların transferi sektorunun bazasında Texnologiyaların transferi şöbəsinin yaradılması haqqında da qərar qəbul olunub.
Beynəlxalq qrant və layihələr Mərkəzi Universitetin elmi-tədqiqat potensialının beynəlxalq elmi proqramlara daha fəal inteqrasiyasına, beynəlxalq qrant və layihələrin cəlb edilməsinin sistemli təşkilinə, elmi kollektivlərin layihələrin hazırlanması və idarə olunması sahəsində bacarıqlarının inkişaf etdirilməsinə xidmət edəcək. Mərkəz, eyni zamanda, BDU alimlərinin beynəlxalq elmi konsorsiumlarda və tədqiqat proqramlarında iştirak imkanlarının genişləndirilməsinə şərait yaradacaq.
Texnologiyaların transferi şöbəsi isə Universitetdə əldə olunan elmi nəticələrin, texnoloji həllərin və əqli mülkiyyət obyektlərinin müəyyənləşdirilməsi, hüquqi qorunması, kommersiyalaşdırılması və sənaye sektoruna transferi istiqamətində fəaliyyəti institusional səviyyədə gücləndirəcək. Şöbənin fəaliyyəti Universitet–sənaye əməkdaşlığının genişləndirilməsinə, elmi nəticələrin praktik və iqtisadi dəyərə çevrilməsinə, eləcə də innovativ məhsul və texnologiyaların yaradılmasına dəstək verəcək.