BDU-da Məhəmməd Füzulinin fəlsəfi irsinə dair elmi seminar keçirilib
Bakı Dövlət Universitetinin (BDU) Sosial elmlər və psixologiya fakültəsinin Fəlsəfə kafedrasında Məhəmməd Füzulinin fəlsəfi görüşlərinə həsr edilən elmi seminar keçirilib.
Fəlsəfə kafedrasının müdiri, dosent Kəmalə Pənahova Azərbaycan Respublikasının Prezidenti İlham Əliyevin Məhəmməd Füzulinin 530 illiyinin qeyd edilməsi haqqında Sərəncamının dahi şair və mütəfəkkirin yaradıcılığının təbliğində mühüm əhəmiyyətə malik olduğunu bildirib. O qeyd edib ki, Füzuli Azərbaycan bədii-fəlsəfi fikrinin inkişafında böyük rol oynayıb, antik filosofların, Şərq peripatetik fəlsəfəsi nümayəndələrinin fikirlərinə bələd olub, öz fəlsəfi əsərlərində onları ümumiləşdirib, dövrünün əsas problemlərinin dərin fəlsəfi təhlilini verib.
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun Türk xalqlarının fəlsəfə tarixi və müasir fəlsəfəsi şöbəsinin müdiri, dosent Faiq Ələkbərli “Məhəmməd Füzulinin türk xalqlarının fəlsəfəsi tarixində yeri” mövzusunda məruzə ilə çıxış edib. Məruzəçi Füzulinin türk poeziya dünyasındakı roluna, yaradıcılığındakı fəlsəfi yanaşmalara diqqət çəkib.
Sonra institutun aparıcı elmi işçisi, Fəlsəfə kafedrasının saathesabı müəllimi, dosent Zeynəddin Şabanov “Məhəmməd Füzulinin "Mətlə-ül-etiqad” əsərində dünya fəlsəfi irsinə münasibət” mövzusunda çıxış edib. Məruzəçi bildirib ki, "Mətlə-ül-etiqad” fəlsəfə ilə kəlamı özündə birləşdirən teoloji risalədir. Füzulu bu əsərdə elm və mərifət (bilik) məfhumlarına müxtəlif təriflər verib, biliyin növləri və onların əldə edilməsi üsullarını araşdırıb. İnsanın kamilləşməsi üçün biliklərə yiyələnməni zəruri hesab edən, elmli və bilikli olmağı cəmiyyətin inkişafı üçün əsas amil kimi götürən Füzulinin dahiyanə fəlsəfi fikirləri sonralar müsəlman filosofları tərəfindən daha da inkişaf etdirilib.
Sonda iştirakçıların sualları cavablandırılıb.