BDU-da elmi seminar: “Elmin inkişafı Azərbaycanda dövlət siyasətinin prioriteti kimi”
Bakı Dövlət Universitetinin (BDU) İnformasiya və sənəd menecmenti fakültəsində professor-müəllim heyətinin, doktorant və magistrantların iştirakı ilə 27 mart – Azərbaycan Respublikasında “Elm günü” ilə bağlı silsilə tədbirlər çərçivəsində növbəti elmi seminar keçirilib. Elmi seminarda BDU-nun Kitabxanaşünaslıq kafedrasının dosenti Pərviz Kazimi “Elmin inkişafı Azərbaycanda dövlət siyasətinin prioriteti kimi” mövzusunda məruzə edib.
Tədbirdə giriş sözü ilə çıxış edən BDU-nun Elmi fəaliyyətin təşkili və innovasiyalar Mərkəzinin direktoru, professor Mais Süleymanov elmin tarixinə nəzər salıb, ölkəmizin bu sahədə qazandığı nailiyyətlərdən bəhs edib. O, Ulu Öndər Heydər Əliyevin Azərbaycana rəhbərlik etdiyi hər iki dövrdə ölkəmizdə elmin inkişafı üçün müstəsna xidmətlər göstərdiyini diqqətə çatdırıb, bu gün həmin siyasətin Prezident İlham Əliyev tərəfindən uğurla davam etdirildiyini vurğulayıb.
Sonra seminar dosent Pərviz Kaziminin məruzəsi ilə davam edib. Pərviz Kazimi əvvəlcə ölkəmizdə elmin inkişafına göstərilən dövlət qayğısından bəhs edib, bu sahədə qəbul edilmiş bir sıra fundamental sənədlər, eləcə də elm siyasətini həyata keçirən qurumlar, onların vəzifələri barədə ətraflı məlumat verib: “Dövlət başçısının 2018-ci il 9 aprel tarixli Sərəncamına əsasən, hər il martın 27-nin “Elm günü” kimi qeyd olunması, ölkəmizdə elmin inkişafına hərətərəfli diqqətin göstərilməsi bu fəaliyyət sahəsinin dövlətimiz üçün prioritet istiqamət olduğunun bariz nümunəsidir”.
Məruzədə elmşünaslıqda yeni istiqamətlər, müasir trendlər, xüsusilə Azərbaycan elminin dünya elminə inteqrasiyası kimi mühüm məsələlərə toxunulub, bir sıra müqayisəli təhlillər aparılıb. Hazırda elmin inkişafında tətbiqi xarakterli tədqiqatların aparılmasının və alınmış mühüm nəticələrin nüfuzlu beynəlxalq elmi bazalarda (“Scopus”, “Web of Science”, “Google Scholar” və s.) indeksləşdirilmiş jurnallarda əksini tapmasının vacibliyini vurğulayan natiq ölkəmizin son illər bu istiqamətdə əldə etdiyi uğurları faktlarla diqqətə çatdırıb, mövcud dinamikanı xronoloji inkişafda təqdim edib.
Araşdırmada ölkə alimlərinin əldə etdiyi mühüm elmi nəticələr, nüfuzlu elmi jurnallarda dərc olunmuş məqalələr, alimlərimizin Hirş indeksləri və istinad göstəriciləri barədə dinamika əksini tapıb. Məruzədə həmçinin milli H-indeksi platforması barədə məlumat verilib, elmi aktivliyin qiymətləndirilməsində tətbiq edilən bibliometrik metodlar şərh olunub. Son illər BDU-nun bu istiqamətdə mühüm nailiyyətlər əldə etdiyini vurğulayan Pərviz Kazimi qeyd edib ki, BDU ölkəmizin nüfuzlu beynəlxalq reytinqlərdə ən yüksək göstəricilərə malik olan ali təhsil müəssisəsidir və bu dinamika davamlı olaraq inkişaf etdirilir.
Məruzə seminar iştirakçıları tərəfindən böyük maraqla qarşılanıb, mövzu ətrafında geniş müzakirələr aparılıb.
