BDU-da ATU-nun 95 illik yubileyi qeyd olunub
Bakı Dövlət Universitetində (BDU) Azərbaycan Tibb Universitetinin yaradılmasının 95 illik yubileyinə həsr olunmuş tədbir keçirilib.
Əvvəlcə Dövlət himni səsləndirilib. Torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla qeyd olunub.
BDU rektoru Elçin Babayev milli səhiyyə sistemimizin, ali tibb təhsilinin inkişafında mühüm rol oynamış ATU-nun 95 illik yubileyi münasibətilə Universitetin kollektivini təbrik edib, gələcək fəaliyyətlərində uğurlar arzulayıb. Rektor diqqətə çatdırıb ki, 1919-cu ildə təsis edilmiş Bakı Dövlət Universitetinin Tibb fakültəsi əsasında 1930-cu ildə Azərbaycan Dövlət Tibb İnstitutu yaradılıb: “İlk dərs ilində BDU-da yalnız Tarix-filologiya və Tibb fakültələri fəaliyyət göstərirdi. BDU-ya ilk tələbələr 1919-cu ilin noyabrında qəbul edilib, Tibb fakültəsinə 368 tələbə və 122 sərbəst dinləyici qəbulu həyata keçirilib. Elə ilk illərdən elmi-pedaqoji keyfiyyətə üstünlük verilərək, həm nəzəri, həm də klinik tibb təhsilinin inkişafına zəmin yaradılıb, milli tibbi kadrların yetişdirilməsinə önəm verilib. Tibb Universitetinin əsası məhz belə möhkəm əsaslar üzərində qurulub. Bu faktlar təkcə tarixi bir əlaqə deyil - iki universitet arasında formalaşmış elmi və akademik ənənənin başlanğıcıdır. Sələflərimizin zəhməti və elmi məktəbi bu gün səhiyyə sahəsində ali təhsil ocağının inkişafı və nailiyyətlərinin əsasını təşkil edir”.
BDU rektoru vurğulayıb ki, hazırda bu ənənələr yeni məzmunla davam edir. Azərbaycan Tibb Universiteti regionda ali tibbi təhsilin aparıcı mərkəzlərindən birinə çevrilib, beynəlxalq elmi mühitlə fəal əməkdaşlıq edir və qlobal akademik proseslərdə fəal iştirakçı rolunu oynayır: “Universitetin bu nailiyyətləri ölkəmizdə elmə, təhsilə və səhiyyəyə göstərilən dövlət qayğısının nəticəsidir. Ümummilli Lider Heydər Əliyevin müəyyən etdiyi strateji kurs bu gün Azərbaycan Respublikasının Prezidenti cənab İlham Əliyevin rəhbərliyi ilə ardıcıl şəkildə həyata keçirilir. Son illərdə dövlətimizin səhiyyə sistemində həyata keçirdiyi islahatlar bu strategiyanın praktik təzahürüdür. Müasir standartlara cavab verən tibb müəssisələrinin yaradılması, regionlarda ixtisaslaşdırılmış diaqnostika və müalicə mərkəzlərinin fəaliyyətə başlaması, infrastrukturun yenilənməsi və rəqəmsallaşma prosesinin sürətlənməsi səhiyyə xidmətlərinin keyfiyyətini və əlçatanlığını əhəmiyyətli dərəcədə artırıb. Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondunun səhiyyə, sosial müdafiə və təhsil sahələrində həyata keçirdiyi layihələr ölkədə tibbi xidmətlərin keyfiyyətinin yüksəldilməsinə və əhalinin rifahının yaxşılaşdırılmasına mühüm töhfə verir. Bu strateji xəttin davamı olaraq BDU və ATU qarşısında da mühüm vəzifələr dayanır. Hər iki ali təhsil müəssisəsi bu dövlət siyasətinin elmi-tədris dayaqlarını möhkəmləndirən, tibbi və fundamental elmlər arasında körpü yaradan əsas elmi mərkəzlər kimi çıxış etməlidirlər. Biz inanırıq ki, bu əməkdaşlıq təkcə iki ali məktəbin deyil, bütövlükdə Azərbaycan elminin və səhiyyəsinin gələcək inkişafına xidmət edəcək”.
Azərbaycan Tibb Universitetinin rektoru Gəray Gəraybəyli rəhbərlik etdiyi ali təhsil ocağının 95 illik yubileyinin məhz BDU-da keçirilməsinin rəmzi mənasının olduğunu bildirib. O qeyd edib ki, ATU BDU ilə qırılmaz tellərlə bağlıdır, ölkədə ali tibb təhsilinin əsası 1919-cu ildə məhz BDU-da qoyulub: “Azərbaycan Tibb Universiteti 1930-cu ildə BDU-nun Tibb fakültəsinin bazası əsasında yaradılaraq müstəqil ali məktəbə çevrilib. Bu mənəvi bağ indi də davam edir, iki ali məktəb arasında səmərəli əməkdaşlıq mövcuddur. Biz müxtəlif sahələr üzrə bu əlaqələri daha da inkişaf etdirməyə hazırıq. Ümid edirəm ki, biz qarşıda birgə nailiyyətlərimizi qeyd edəcəyik”.
Rektor vurğulayıb ki, ATU-nun yaradılması ölkəmizdə səhiyyənin və tibb təhsilinin inkişafı tarixində önəmli bir dönüş nöqtəsidir. Rektor Ulu Öndər Heydər Əliyevin elmə, təhsilə, xüsusilə də tibb sahəsinin inkişafına böyük diqqət və qayğı ilə yanaşdığını qeyd edib. Bu qayğı Prezident İlham Əliyev və Birinci vitse-prezident Mehriban xanım Əliyeva tərəfindən davam etdirilir: “Vaxtilə ATU ölkədə ali tibb təhsili verən yeganə universitet idi. Sevindirici haldır ki, bu il biz ATU-nun 95, Naxçıvan Dövlət Universitetində Tibb fakültəsinin 25 illik yubileyini, Qarabağ Universitetində isə Tibb fakültəsinin yaradılmasını qeyd edirik. Bu, Azərbaycanda tibb təhsili tarixinin inkişafını göstərir”.
BDU-nun elm və innovasiyalar üzrə prorektoru Hüseyn Məmmədov, ATU-nun elmi işlər üzrə prorektoru Məlahət Sultan, Əczaçılıq toksikologiyası və kimya kafedrasının professoru Fikrət Quliyev, Tibbi və bioloji fizika kafedrasının müdiri, dosent İsmayıl Qafarov çıxışlarında ATU-nun keçdiyi inkişaf yoluna nəzər salıb, BDU-ATU əməkdaşlığının yeni inkişaf istiqamətləri barədə fikirlərini bölüşüblər.
Sonda ATU-nun tarixi və fəaliyyəti haqqında videoçarx nümayiş olunub.
