ADU tələbələri BDU-nun Jurnalistika fakültəsi ilə tanış olublar
Azərbaycan Mətbuat Şurasında təcrübə keçən Azərbaycan Dillər Universitetinin bir qrup tələbəsi Bakı Dövlət Universitetinin (BDU) Jurnalistika fakültəsində olub.
BDU-nun Jurnalistika fakültəsinin dekanı Vüqar Əliyev tələbələrə fakültə haqqında məlumat verib, bu cür görüşlərin gənc jurnalistlərin peşəkar formalaşmasında mühüm əhəmiyyət daşıdığını bildirib. Qeyd edib ki, nəzəri biliklərlə yanaşı, praktik təcrübənin artırılması və real media mühitinə inteqrasiya jurnalist hazırlığında əsas istiqamətlərdəndir.
Beynəlxalq jurnalistika və informasiya siyasəti kafedrasının müdiri Aynur Nəsirova jurnalistikada elmi əsaslı araşdırmanın vacibliyindən, analitik təfəkkürün və geniş dünyagörüşünün formalaşdırılmasının əhəmiyyətindən söz açıb. Müasir media mühitində peşəkar jurnalistin yalnız informasiya ötürücüsü deyil, eyni zamanda cəmiyyətdəki prosesləri dərin təhlil edən tədqiqatçı olduğunu deyib.
Yeni media və kommunikasiya nəzəriyyəsi kafedrasının müdiri Xatirə Hüseynova müasir dövrdə media mühitinin sürətlə transformasiya olunduğunu və rəqəmsal platformaların informasiya istehsalı ilə yanaşı, ictimai rəyin formalaşmasında da mühüm rol oynadığını bildirib. Yeni media alətləri yalnız texniki bacarıq deyil, həm də analitik düşüncə, media etikası və informasiya təhlükəsizliyi bilikləri tələb edir. Buna görə də media savadlılığını artırmaq, dezinformasiyaya qarşı həssas olmaq və peşəkar məsuliyyət prinsiplərinə sadiq qalmaq gənc jurnalistlər üçün mütləqdir.
Jurnalistika fakültəsinin sosial məsələlər və tələbələrlə iş üzrə dekan müavini Samir Xalidoğlu tələbələri Jurnalistika fakültəsində yaradılan Azərbaycan Mətbuat Şurasının, Medianın İnkişafı Agentliyinin, AZƏRTAC-ın xüsusi auditoriyaları, “ARB24”ün “Newslab” təlim otağı, “Xalq qəzeti” debat otağı, “Füyuzat” Media mərkəzi və Milli mətbuat tarixi auditoriyası ilə tanış edib.
Daha sonra BDU-nun Tədris tele-radio studiyasının müdiri Ramin Rzayev tələbələrə studiyanın maddi-texniki bazası, tələbələrin burada həyata keçirdikləri praktik yayım və montaj proseslərində iştirakı haqqında ətraflı məlumat verib.
