yy
Bakı Dövlət Universitetinin (BDU) nümayəndə heyəti Qırğızıstanın Bişkek şəhərində yerləşən İ. Razzakov adına Qırğız Dövlət Texniki Universitetində olub.
Səfər çərçivəsində BDU rektorunun keyfiyyət təminatı üzrə müşaviri Asiman İlyasov və Beynəlxalq əməkdaşlıq şöbəsinin müdiri Rauf Həsənov İ. Razzakov adına Qırğız Dövlət Texniki Universitetinin reputasiya və əməkdaşlıq üzrə koordinatoru, professor Erkin Boronbayev və beynəlxalq əlaqələr mərkəzinin direktoru Rinat Vakutov ilə görüşüb.
Görüşdə ali təhsil müəssisələri arasında beynəlmiləlləşmə, texniki elmlər sahəsində birgə tədqiqatların aparılması və ikitərəfli əməkdaşlığın genişləndirilməsi məsələləri müzakirə olunub.
BDU nümayəndələri universitetin rəqabət qabiliyyətinin artırılması, qlobal elmi mühitdə fəal iştirakının təmin edilməsi və beynəlxalq əməkdaşlığın möhkəmləndirilməsi istiqamətində görülmüş işlər barədə geniş təqdimatla çıxış ediblər.
İ. Razzakov adına Qırğız Dövlət Texniki Universitetinin nümayəndələri BDU ilə əməkdaşlığın yeni imkanlar yaradacağını vurğulayıb və iki universitet arasında gələcək əməkdaşlığın qarşılıqlı fayda gətirəcəyinə əminliklərini ifadə ediblər.
