“Xocalı BDU-nun Jurnalistika fakültəsinin müəllimlərinin gözü ilə”
Bakı Dövlət Universitetinin (BDU) Jurnalistika fakültəsində Xocalı soyqırımının 33-cü ildönümünə həsr olunmuş “Xocalı BDU-nun Jurnalistika fakültəsinin müəllimlərinin gözü ilə” adlı tədbir keçirilib.
Əvvəlcə torpaqlarımızın azadlığı uğrunda həlak olan şəhidlərimizin və Xocalı faciəsi qurbanlarının əziz xatirəsi bir dəqiqəlik sükutla yad edilib.
Jurnalistika fakültəsinin sosial məsələlər və tələbələrlə iş üzrə dekan müavini Samir Mirzəyev bildirib ki, 1992-ci il fevralın 25-dən 26-na keçən gecə Xocalıda baş verən soyqırım aktı təkcə Azərbaycan xalqına deyil, bütün insanlığa qarşı törədilmiş bəşəri cinayətdir. Bu faciəni bütün dünyaya çatdırmaq üçün tələbə jurnalistlərin üzərinə xüsusi məsuliyyət düşür. Şəffaflığı, operativliyi və obyektivliyi əsas meyar kimi götürən gənc jurnalistlərin vətəndaşlıq borcu tarixi həqiqətlərimizi və xalqımızın başına gətirilən müsibətləri unutmamaq və unutdurmamaqdır.
BDU-nun Multimedia və elektron kommunikasiya kafedrasının müdiri, professor Qulu Məhərrəmli Xocalıdakı hadisələrin baş verdiyi mürəkkəb dövr, faciədən əvvəl və sonra yaşananlar barədə ətraflı məlumat verib. O, 1991-ci ilin dekabr-yanvar aylarında Azərbaycan Dövlət Televiziyasının (AZTV) əməkdaşı kimi Xocalıda ezamiyyətdə olarkən şahidi olduğu ağır blokada vəziyyəti, Xocalının müdafiəsiz qalması, şəhərdə yaşanan acınacaqlı durum və insanların pərişan vəziyyəti barədə təəssüratlarını tələbələrlə bölüşüb. Bildirib ki, həmin çətin dövrlərin qisasını aldığımız 44 günlük Vətən müharibəsi bütün dünyaya tarixi həqiqətimizi silinməyəcək şəkildə həkk etdirdi və bir dərs verdi: “Qisas dərsi”.
Sonra tələbələrin sualları cavablandırılıb.
