Pakistanın Lahor Universitetinin professoru BDU-da elmi seminar keçirib
Pakistanın Lahor Universitetinin professoru Fazal-e-Aleem “Fizikada müasir trendlər” (“Modern Trends in Physics”) IX Beynəlxalq konfransı çərçivəsində Fizika və Mexanika-riyaziyyat fakültələrinin professor-müəllim heyəti, magistrantları və doktorantları üçün “Zərrəciklərin elastik səpilməsinin genişləndirilmiş Chou-Yang modeli ilə öyrənilməsi” mövzusunda elmi seminar keçirib.
Fazal-e-Aleem bildirib ki, elementar zərrəciklərin quruluşu və qarşılıqlı təsirləri müasir elementar zərrəciklər fizikasının əsasını təşkil edir. Belə ki, hadronların fundamental strukturu və dinamikası ilə bağlı bir sıra məsələlər hələ də tam aydınlaşdırılmadığından, müxtəlif eksperimental qurğularda aparılan tədqiqatlar bu sahədə nəzəri modellərin dəqiqləşdirilməsi üçün mühüm əhəmiyyət daşıyır.
Məruzəçi vurğulayıb ki, yüksək enerjili zərrəciklərin toqquşmaları zamanı müşahidə olunan çoxsaylı səpilmə məsələləri anizotrop səpilməni nəzərə alan genişləndirilmiş Chou-Yang modelinin çərçivəsində effektiv şəkildə izah olunur. Bu yanaşma hadronların daxili quruluşunun öyrənilməsi üçün səmərəli metod hesab edilir. Xüsusilə də proton və digər hadronların elektromaqnit form-faktorlardan istifadə etməklə orta-kvadratik radiuslarının hesablanmasında modelin tətbiqi özünü yaxşı doğruldur. Nəzəriyyə həm gözlənilən, həm də yeni eksperimental nəticələrlə harmonik şəkildə uzlaşır.
Sonda məruzə ətrafında geniş fikir mübadiləsi aparılıb və seminar iştirakçılarının sualları cavablandırılıb.
