AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Ekologiya və torpaqşünaslıq fakültəsində 27 mart - Azərbaycan Respublikasında “Elm günü”nə həsr edilmiş tədbir keçirilib. Tədbirdə çıxış edən dekan Akif Ağbabalı “Elm günü” nün təsis edilməsinin əhəmiyətindən danışıb, bildirib ki, əlamətdar tarix ilə əlaqədar ölkəmizin ali təhsil müəssisələrində, elmi-tədqiqat institutlarında müasir elmin aktual problemlərinə həsr olunmuş silsilə tədbirlər - elmi konfranslar, seminarlar, simpoziumlar, mühazirələr, dəyirmi masalar keçirilir. Bu ənənə ölkə alimlərini bir araya gətirməklə əldə olunan elmi nəticələrin müzakirəsinə imkan yaradır. Akif Ağbabalı 2024-cü il üzrə BDU-nun Ekologiya və torpaqşünaslıq fakültəsinin elmi fəaliyyətinin məhsuldar olduğunu diqqətə çatdırıb.

Daha sonra Ekoloji kimya kafedrasının müdiri, professor Sevinc Hacıyeva və Coğrafi ekologiya kafedrasının professoru Şövqi Göyçaylı çıxış ediblər. Çıxışçılar Azərbaycanda və dünyada elm və təhsilin formalaşması, inkişaf tarixindən, ölkəmizdə elmin nüfuzunun yüksəldilməsi, elm və təhsilin inkişafına dövlət səviyyəsində göstərilən qayğıdan bəhs ediblər. Onlar gənc tədqiqatçıların elmin inkişafındakı əhəmiyyətindən, fakültənin istiqamətlərinə uyğun ekoloji kimya elminin inkişaf edərək təməl elmlərdən biri olması istəyindən və Azərbaycan elminin bu günlərə gəlib çatmasında Milli Elmlər Akademiyasının rolundan ətraflı danışıblar.