Maliyyə Monitorinqi Xidməti BDU-da maarifləndirici sessiya təşkil edib
Bakı Dövlət Universitetində (BDU) Maliyyə Monitorinqi Xidməti tərəfindən cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsi ilə mübarizə (ƏL/TMM) sahəsində ictimai maarifləndirməni gücləndirmək məqsədilə xüsusi sessiya təşkil olunub. Tədbirin əsas məqsədi ƏL/TMM sistemi üzrə beynəlxalq standartlar, milli qanunvericilik və Maliyyə Monitorinqi Xidmətinin fəaliyyəti barədə tələbələri məlumatlandırmaq olub.
BDU-nun Humanitar məsələlər və gənclər siyasəti şöbəsinin mütəxəssisi Fidan İsmayılova Maliyyə Monitorinqi Xidməti barədə tələbələrə məlumat verib, xüsusi sessiyanın tələbələr üçün əhəmiyyətindən danışıb. Daha sonra çıxış edən ƏL/TMM üzrə ekspert Fuad Əliyev Hüquq, Beynəlxalq münasibətlər və iqtisadiyyat, Tətbiqi riyaziyyat və kibernetika və Mexanika-riyaziyyat fakültələrinin tələbələrinə ƏL/TMM anlayışı, beynəlxalq standartlar və milli qanunvericilik, Maliyyə Monitorinqi Xidmətinin fəaliyyəti və beynəlxalq əməkdaşlığı barədə ətraflı məlumat verib. İştirakçıların mövzuya daha yaxından bələd olması üçün qlobal ƏL/TMM sistemi bağlı xüsusi videoçarx nümayiş etdirilib, Xidmətin Elektron Tədris Platforması təqdim olunub. Tələbələr platformanın modulları və təqdim olunan tədris resursları ilə tanış olublar.
Tədbirdə 200-dən çox tələbə iştirak edib.
