Görkəmli hüquqşünas alim, BDU-nun kafedra müdiri Kamil Səlimovun 70 illik yubileyi qeyd olunub
Bakı Dövlət Universitetinin (BDU) Hüquq fakültəsində görkəmli alim, Kriminalistika və məhkəmə ekspertizası kafedrasının müdiri, hüquq elmləri doktoru, professor Kamil Səlimovun 70 illik yubileyinə həsr olunmuş tədbir keçirilib.
BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev hüquq elminin inkişafında mühüm rol oynamış Kamil Səlimovu yubileyi münasibətilə təbrik edib. O bildirib ki, Universitet fəaliyyət göstərdiyi illər ərzində daim öz müəllim və professor heyəti ilə fəxr edib. 40 ildən artıq hüquq elminə sədaqətlə xidmət göstərən Kamil Səlimov kriminalistika sahəsində fundamental tədqiqatlar aparıb, Azərbaycanda bu istiqamətin elmi əsaslarının möhkəmlənməsinə mühüm töhfələr verib. Alim yalnız elmi fəaliyyəti ilə deyil, həm də pedaqoji fəaliyyəti ilə yüzlərlə hüquqşünasın yetişməsində mühüm rol oynayıb. Onun rəhbərliyi ilə formalaşan kriminalistika məktəbi bu gün də ölkənin hüquq-mühafizə və məhkəmə sistemində çalışan mütəxəssislərin hazırlanmasına töhfə verir. Qeyd edib ki, Kamil Səlimovun elmi irsi, hazırladığı dərslik və monoqrafiyalar hüquq elmi üçün qiymətli mənbədir.
BDU-nun Hüquq fakültəsinin dekanı Zaur Əliyev Kamil Səlimovun zəngin elmi və pedaqoji fəaliyyətindən bəhs edib, onun həyatının gənc hüquqşünaslara örnək olduğunu vurğulayıb.
Əmək və ekologiya hüququ kafedrasının müdiri Alış Qasımov “Professor Kamil Səlimovun həyat və yaradıcılığı haqqında”, Kriminalistika və məhkəmə ekspertizası kafedrasının dosenti Bəxşeyiş Əsgərov “Azərbaycan Respublikasında kriminalistika elminin inkişafında professor Kamil Səlimovun rolu” mövzularında məruzə ediblər. Qeyd olunub ki, Kamil Səlimovun rəhbərliyi ilə Kriminalistika və məhkəmə ekspertizası kafedrası mühüm inkişaf yolu keçib, tədris prosesinə müasir və innovativ yanaşmalar tətbiq olunub. Onun təşəbbüsü ilə “Rəqəmsal kriminalistika” və “Molekulyar kriminalistika” kimi yeni istiqamətlər üzrə tədris proqramları hazırlanıb. Kamil Səlimovun elmi fəaliyyəti yalnız akademik çərçivə ilə məhdudlaşmır. Onun terrorizmə qarşı mübarizə sahəsində apardığı tədqiqatlar, xüsusilə “Terrorizmin müasir problemləri” adlı monoqrafiyası beynəlxalq elmi ictimaiyyət tərəfindən maraqla qarşılanıb və bu sahədə aparılan araşdırmaların əsas mənbələrindən birinə çevrilib.
Azərbaycan Respublikasının Vəkillər Kollegiyasının Ağsaqqallar Şurasının sədri, Əməkdar hüquqşünas İkram Kərimov, Baş Prokurorluğun Elm-Tədris Mərkəzinin rəisi Fazil Həsənəliyev, Dövlət Təhlükəsizliyi Xidmətinin Heydər Əliyev adına Akademiyasının rəisi, general-mayor Elşad Nəsirov, Vəkillər Kollegiyasının sədr müavini Aydın Axundov, BDU-nun Jurnalistika fakültəsinin kafedra müdiri Qulu Məhərrəmli və digərləri professor Kamil Səlimovun hüquq elminin inkişafındakı xidmətlərini, elmi və pedaqoji fəaliyyətini yüksək qiymətləndirib, yubilyara uğurlar arzulayıblar.
