Əcnəbi tələbə: “BDU akademik və şəxsi inkişafımda əvəzsiz rol oynayıb”
Müsahibimiz Azərbaycan Respublikasının Xarici İşlər Nazirliyi və Elm və Təhsil Nazirliyi tərəfindən birgə icra edilən 2024-2025-ci tədris ili üçün “Heydər Əliyev adına Beynəlxalq Təhsil Qrantı” proqramının qalibi, Bakı Dövlət Universitetinin (BDU) Jurnalistika fakültəsinin I kurs doktorantı Ehab Məhəmməd İsmayıldır.
Misir Ərəb Respublikasından olan Ehab İsmayıl qrant proqramı çərçivəsində qazandığı təcrübə, Azərbaycan təhsil sistemi, BDU-da tələbə həyatı haqqında fikirlərini paylaşıb. O, həmçinin Azərbaycanın beynəlxalq təhsil sahəsindəki mövqeyi, gələcək hədəfləri barədə də planlarını bölüşüb.
- Ehab, akademik və şəxsi inkişaf baxımından BDU-da təhsil almaq sənə hansı üstünlükləri qazandırıb?
- BDU mənim həm akademik, həm də şəxsi inkişafımda əvəzsiz rol oynayıb. Akademik baxımdan universitetin təcrübəli müəllimlərindən dərs alaraq biliklərimi daha da zənginləşdirdim. Jurnalistika fakültəsindəki təhsil mənə yalnız nəzəri bilik deyil, həm də praktiki təcrübə qazandırıb. Universitetdə keçirilən seminarlar, təcrübə proqramları və müxtəlif layihələr real iş mühitində fəaliyyətimi nümayiş etdirmə imkanı yaradıb. BDU-nun azərbaycanlı və xarici tələbələri ilə daim ünsiyyətdəyəm, bu, mənim formalaşmağıma da yaxşı təsir edir. Şəxsi inkişaf baxımından BDU mənə liderlik bacarıqları, özgüvən, digər insanlarla daha yaxşı ünsiyyət qurma qabiliyyəti aşılayıb.
- Tələbə həyatın necə keçir? Gündəlik fəaliyyətin və maraqların haqqında danışa bilərsənmi?
- Tələbə həyatım maraqlı və rəngarəngdir. BDU-nun “Tələbə Evi”ndə yaşayıram. Orda tələbələr üçün lazım olan bütün şərait yaradılıb. Həm dərslərimi, həm də sosial həyatımı bir-birinə paralel təşkil etməyə çalışıram. Tələbəlik yeni dostlar tapmaq, müxtəlif ideyalarla tanış olmaq, təcrübə qazanmaq üçün gözəl bir fürsətdir. Təbii ki, bəzən çətinliklər də olur, amma bu, tələbə həyatının bir parçasıdır. Əsas odur ki, bu çətinliklərdən dərs çıxarmağı bacarasan. Asudə vaxtlarımda Azərbaycanın bölgələrini gəzməyə çalışıram. Şəki, Quba, Qəbələ, Şamaxı, Gəncə, İsmayıllı kimi şəhərlərə səfər etmişəm. Azərbaycan xalqının qonaqpərvərliyi, gülərüzlülüyü çox diqqətimi çəkdi. Mətbəxiniz də çox dadlıdır. Xüsusilə xaş, xəngəl, dolma sevdiyim milli mətbəx nümünələridir.
- Ehab, ölkəmizin təhsil sistemi haqqında düşüncələrini bizimlə bölüşərdin.
- Azərbaycan təhsil sistemi son illərdə çox müsbət dəyişikliklərə uğrayıb. Bu inkişafın bir hissəsi olmaqdan məmnunam. BDU-da müasir tədris metodlarının tətbiqi, beynəlxalq əlaqələrin gücləndirilməsi və yeni təhsil proqramlarının hazırlanması çox sevindiricidir. Bu, təhsil sisteminin daha praktik yönümlü olması ilə əlaqədardır. Artıq universitetlərin çoxu yalnız nəzəri biliklərlə məhdudlaşdırmır, tələbələrə real həyat bacarıqları qazandırmaq üçün müxtəlif təcrübə proqramları və layihələr təqdim edirlər. Xüsusilə tələbələrin beynəlxalq səviyyədə təhsil alması üçün yaradılan imkanlar çox dəyərlidir. Mən magistr təhsilimi də məhz BDU-nun Jurnalistika fakültəsində almışam. Müəllimlərim səmimi və diqqətlidirlər, tələbələrə yalnız bilik vermək deyil, onları şəxsi inkişafa yönəltmək üçün əllərindən gələni edirlər. Mənim üçün müəllimlərlə açıq dialoq qurmaq çox vacibdir. Bu, tələbələrin daha uğurlu və motivasiyalı olmasına kömək edir.
- Azərbaycan mədəniyyəti və xalqı haqqında nə düşünürsən? Ölkəmizin mədəniyyəti, adət-ənənələri və insanları ilə bağlı fikirlərin necədi?
- Azərbaycan xalqı qonaqpərvərdir. Mən bir çox ölkələrdə olmuşam, amma Azərbaycan xalqının qonaqpərvərliyi və insanlara olan yaxınlığı mənə çox təsir edib. Düşünürəm ki, Misir və Azərbaycan xalqı arasında böyük bir fərq yoxdur. Hər iki xalq mehriban və səmimidi. Hər iki mədəniyyətin zəngin tarixi və ənənələri var, amma insan münasibətlərindəki oxşarlıqlar daha çox diqqətimi çəkib. Azərbaycan xalqı da Misir xalqı kimi ailə və dost münasibətlərinə çox önəm verir, bu da cəmiyyətdəki əlaqələrin daha sıx və dərin olmasına səbəb olur.
- Azərbaycanın media sistemini izləyirsənmi?
- Bəli, Azərbaycan mediasını yaxından izləyirəm. Azərbaycan mediasında son zamanlar sosial şəbəkələr və onlayn platformaların rolu böyükdür. Lakin ənənəvi media da öz əhəmiyyətini itirmir. Ən çox xəbər agentliklərini, xüsusilə AZƏRTAC-ı izləyirəm, çünki orada daha rəsmi və dəqiq məlumatlar təqdim olunur. Tədqiqat işim dünya siyasətində medianın rolu ilə bağlı olduğuna görə, bu istiqamətdə tendensiyaları izləyirəm. Milli televiziya kanallarına da baxmaq imkanım olur. AZTV, İctimai TV ən çox izlədiyim telekanallar sırasındadır. AZƏRTAC-da keçdiyim təcrübə mənim üçün çox önəmli və dəyərli oldu. Burada real jurnalistika işinin necə aparıldığını, xəbər yazılmasında doğru yanaşmanın nələr olduğunu öyrəndim. AZƏRTAC-da çalışarkən peşəkar jurnalistlərdən çox şey öyrəndim və onların iş prinsipini daha yaxından tanıdım. Burada əldə etdiyim təcrübə beynəlxalq standartlara uyğun media bacarıqlarımı inkişaf etdirməyimə kömək edir. Təcrübə həm də mənə medianın dövlət və xalq arasında körpü rolunu oynadığını göstərdi. Bu, gələcəkdə peşəkar olaraq fəaliyyət göstərəcəyim sahə üçün çox vacib bir məqamdır.
- Gələcəklə bağlı planların nələrdir?
- İlk növbədə jurnalistika sahəsində daha da ixtisaslaşmaq və beynəlxalq media orqanında fəaliyyət göstərmək istəyirəm. Mənim üçün ən böyük hədəf peşəkar jurnalist olmaq və tədqiqatlarımı, yazılarımı dünyaya təqdim etməkdir. Elm və təhsil sahəsində də fəaliyyət göstərmək istəyirəm. Təhsil alarkən qazandığım bilik və təcrübələrə əsaslanaraq, gələcəkdə həm akademik sahədə, həm də praktiki jurnalistikada böyük uğurlar qazanmağı hədəfləyirəm. "Heydər Əliyev adına Beynəlxalq Təhsil Qrantı” bu baxımdan mənə çox gözəl bir fürsət yaradıb.
Hazırladı: Nərminə Əsədova