“British Council”ın Azərbaycan üzrə direktoru Nərgiz Hacıyeva BDU tələbələri ilə görüşüb
Bakı Dövlət Universitetinin (BDU) Karyera və məzunlarla iş Mərkəzinin Məzunlarla iş şöbəsinin təşkilatçılığı ilə “Təhsildən uğurlu karyeraya addımlar” mövzusunda görüş keçirilib.
Tədbirin qonağı BDU-nun Beynəlxalq münasibətlər və iqtisadiyyat fakültəsinin məzunu, “British Council” təşkilatının Azərbaycan üzrə direktoru Nərgiz Hacıyeva olub.
BDU rektoru Elçin Babayev məzunların Universitetin ən böyük sərvətlərindən olduğunu diqqətə çatdırıb. Nərgiz Hacıyevanın öz uğurlu fəaliyyəti ilə ölkəmizin və BDU-nun adını daim ucaltdığını bildirib. Rektor vurğulayıb ki, Nərgiz Hacıyeva ölkəmizdə təhsilin inkişafı, beynəlxalq təhsil əməkdaşlığının genişləndirilməsi, mədəniyyətlərarası dialoqun təşviqi və iki ölkə arasında humanitar körpülərin möhkəmləndirilməsi istiqamətində uzun illər böyük xidmətlər göstərib. Məhz bu xidmətlərinə görə Nərgiz Hacıyeva Britaniyanın nüfuzlu dövlət təltifinə layiq görülüb.
“British Council” təşkilatının Azərbaycan üzrə direktoru Nərgiz Hacıyeva tələbələrə öz uğur hekayəsi, tələbəlik illəri, karyera yolunda qazandığı ilk təcrübələr haqqında danışıb. Karyerasının formalaşmasında BDU-nun xüsusi rolunun olduğunu deyən Nərgiz Hacıyeva doğma universitetinə həmişə minnətdarlıq duyduğunu bildirib. O qeyd edib ki, 2004-cü ildə BDU-nun Beynəlxalq münasibətlər və iqtisadiyyat fakültəsini bitirib, elə tələbə olarkən könüllülük fəaliyyəti göstərməklə yanaşı, təcrübə proqramlarında iştirak edib.
Qonaq bildirib ki, 13 ildir çalışdığı "British Council"da 4 ildir Azərbaycan üzrə ölkə direktorudur. O, "British Council"ın Azərbaycandakı komandanı idarə etmək üçün təyin etdiyi ilk azərbaycanlı ölkə direktoru olduğunu da diqqətə çatdırıb. Daha sonra qonaq tələbələrə "British Council"ın Azərbaycandakı fəaliyyəti, həyata keçirdiyi layihələr, yaratdığı imkanlar barədə məlumat verib, tələbələri bu imkanlardan yararlanmağa çağırıb. O, tələbələrə müxtəlif proqramlara, forumlara qoşulmağı, daha çox oxumağı, özlərini inkişaf etdirməyi, müxtəlif dilləri öyrənməyi, beynəlxalq sertifikatlar əldə etməyi, gələcəyə iddialı baxmağı tövsiyə edib.
Görüşün sonunda qonaq tələbələrin çoxsaylı suallarını cavablandırıb.
