“Beynəlxalq maliyyə bazarlarında risklərin idarə olunması mexanizmi” – BDU-da ustad dərsi
Bakı Dövlət Universitetinin (BDU) Beynəlxalq münasibətlər və iqtisadiyyat fakültəsində “Paşa Bank”ın faiz riskləri üzrə baş analitiki Elnur Əlimərdanovun “Beynəlxalq maliyyə bazarlarında risklərin idarə olunması mexanizmi” mövzusunda ustad dərsi keçirilib.
Görüşdə fakültənin iqtisadiyyat ixtisasları üzrə IV kurs tələbələri iştirak ediblər.
Ustad dərsində beynəlxalq maliyyə bazarlarında formalaşan risklərin növləri, bu risklərin bank sektoruna, investisiya qərarlarına təsiri, qiymətləndirilməsi və idarə olunması üçün istifadə olunan müasir analitik yanaşmalar müzakirə olunub. Elnur Əlimərdanov qlobal maliyyə bazarlarında faiz dərəcələri, valyuta məzənnələri və likvidlik risklərinin idarə olunması mexanizmlərini real praktiki nümunələr əsasında tələbələrə izah edib. Təlim zamanı maliyyə institutlarında risklərin ölçülməsi və proqnozlaşdırılması prosesində statistik və ekonometrik metodların rolu xüsusi vurğulanıb. Bildirilib ki, beynəlxalq maliyyə bazarlarında sabit və əsaslandırılmış qərarların qəbul edilməsi üçün analitik yanaşmaların və məlumat əsaslı modellərin tətbiqi mühüm əhəmiyyət kəsb edir.
Görüşün sonunda tələbələri maraqlandıran suallar cavablandırılıb, bank sektorunda karyera imkanları və maliyyə analitikası sahəsində tələb olunan bacarıqlar haqqında ətraflı fikir mübadiləsi aparılıb.
