BDU və “ARB 24”ün birgə layihəsi olan növbəti “NewsLab” təlim proqramı başlayıb
Bakı Dövlət Universiteti (BDU) və “ARB 24” telekanalı arasında imzalanmış əməkdaşlıq müqaviləsi çərçivəsində beşinci "NewsLab" təlim proqramı başlayıb.
“Newslab” layihəsi çərçivəsində ilk təlimi “ARB 24”ün icraçı direktoru Elnur Şibliyev keçib. Təlim zamanı tələbələrə sujetlərin hazırlanma mərhələləri, informasiyanın düzgün seçilməsi və təqdim olunması qaydaları haqqında ətraflı məlumat verilib. Real televiziya materialları üzərindən nümunələr göstərilərək, sujetlərin quruluşu, vizual və mətn uyğunluğu kimi mühüm məqamlar izah olunub.
Layihə çərçivəsində təşkil olunan növbəti təlimi isə “ARB 24”ün direktor müşaviri Aynur Nəsirova keçirib. Bu təlimdə reportajın xüsusiyyətləri, mövzunun seçilməsi, hadisə yerindən məlumatın toplanması və tamaşaçıya düzgün çatdırılması kimi əsas məqamlar izah edilib. Təlim iştirakçılarına reportajın strukturu, “stand up”ların qurulması, kadr seçimində diqqət edilməli məqamlar barədə praktik tövsiyələr verilib.
BDU və “ARB 24”ün birgə təşkilatçılığı ilə hazırlanan layihə xəbər hazırlanması, nitq mədəniyyəti, görüntü, videomontaj sahələrini əhatə edir. Layihəni uğurla bitirən tələbələrə sertifikatlar təqdim olunur və iştirakçıların ən azı yarısı əmək müqaviləsi ilə rəsmi şəkildə işə götürülürlər.