BDU və ABŞ-nin Mədəniyyət və Təhsil üzrə Nizamnaməli İnsititutu arasında anlaşma memorandumu imzalanıb
Bakı Dövlət Universitetində (BDU) ABŞ-nin Mədəniyyət və Təhsil üzrə Nizamnaməli İnsititutunun (CCEI) prezidenti və Məsləhət Şurasının sədri Vasif Eyvazzadə ilə görüş keçirilib.
Görüşdə qonağa BDU-nun təhsil, elmi infransturkturu, beynəlxalq əlaqələri barədə məlumat verilib. BDU və CCEI arasında institusional potensialın artırılması, tələbə və professor-müəllim heyətinin dəstəklənməsi, peşəkar inkişaf sahələrində əməkdaşlıq imkanları müzakirə edilib. Tələbə və əməkdaşların beynəlxalq sertifikatlı proqramlara qoşulma perspektivləri ətrafında fikir mübadiləsi aparılıb.
Sonda BDU və ABŞ-nin Mədəniyyət və Təhsil üzrə Nizamnaməli İnsititutu arasında anlaşma memorandumu imzalanıb.
Memorandumda tələbələrin karyera inkişafı və həyat dizaynı bacarıqlarının dəstəklənməsi üçün CCEI-nin “Career and Life Design Lab” və əlaqədar proqramlarının tətbiqi, Universitetin professor-müəllim və inzibati heyətinin CCEI-nin təlim və peşəkar inkişaf imkanları ilə dəstəklənməsi, ABŞ universitetlərinin idarəetmə, kurikulum dizaynı, elm diplomatiyası və institusional təcrübələri üzrə bilik mübadiləsinin təşkili nəzərdə tutulur. BDU-nun strateji planlaşdırma, keyfiyyət təminatı və qlobal rəqabət qabiliyyətinin gücləndirilməsi üçün məsləhət və ekspert dəstəyi göstərmək də memorandumda əksini tapıb.
