BDU tələbələri Siyasi repressiya qurbanları muzeyində
Bakı Dövlət Universitetində (BDU) fəaliyyət göstərən “YENİ Klub”un və “İƏT Modeli” klubunun birgə təşkilatçılığı ilə Dövlət Sərhəd Xidmətinin (DSX) inzibati binasında yerləşən Siyasi repressiya qurbanları muzeyinə ekskursiya təşkil edilib.
Ekskursiya zamanı tələbələrə muzey barədə məlumat verilib. Bildirilib ki, muzey 2019-cu ildə Azərbaycan Sərhəd Mühafizəsinin 100 illiyinə həsr olunmuş tədbirlər çərçivəsində yaradılıb. Muzeyin ekspozisiyası Azərbaycan tarixinin ən acı səhifələrini əyani sürətdə əks etdirir. 1920-1950-ci illərdə sovet dövlətinin apardığı siyasət nəticəsində on minlərlə ictimai və dövlət xadimi, elm, mədəniyyət, incəsənət nümayəndəsi, sıravi vətəndaş repressiyaya məruz qalıb. 1950-ci illərin ikinci yarısında siyasi repressiya qurbanlarına bəraət verilməsinə baxmayaraq, bolşevizmin hökmranlıq etdiyi illərdə siyasi repressiyalar haqqında məlumatların yayılmasına qadağa qoyulub. Yalnız müstəqillik illərində - 1996-cı il martın 15-də Ulu Öndər Heydər Əliyevin imzaladığı “Siyasi repressiya qurbanlarına bəraət verilməsi haqqında” Qanunla bu hadisələrə ilk dəfə hüquqi qiymət verilib.
DSX-nin inzibati binasında muzeyin yaradılması 1925-ci ildən sonra bu binada dövlətin əsas repressiv orqanlarının fəaliyyət göstərməsi ilə əlaqədardır. Binanın zirzəmisində həbs edilənlərin saxlanılma kameraları, istintaq otaqları, ölüm hökmü çıxarılanların güllənməsi yerləri mövcud olub. Muzeyin yaradılmasında əsas məqsədlərdən biri də repressiya qurbanlarının xatirəsinə ehtiram və yaxın keçmişimizin qanlı səhifələri haqqında gənc nəslin nümayəndələrinin düzgün məlumatlandırılmasıdır.
Sonra tələbələr muzeyin eksponatları ilə yaxından tanış olublar.
