BDU tələbələri rəqəmsal marketinqlə bağlı məlumatlandırılıb
“BDU könüllüləri” təşkilatı və “DIV Academy”nin birgə təşəbbüsü ilə “Rəqəmsal körpü: innovasiyaya addım” layihəsi çərçivəsində “Rəqəmsal marketinq” mövzusunda təlim keçirilib.
Təlimçi, “Aliens Agency”nin kreativ direktoru Rəsul Zaidov bildirib ki, rəqəmsal marketinq müasir dövrdə brendlərin hədəf auditoriyaya daha effektiv çatmasında mühüm rol oynayır, düzgün strategiya seçimi uğurun əsas amillərindən biridir. Təlimdə iştirakçılara nəzəri biliklərlə yanaşı, uğurlu reklam nümunələri də təqdim edilib. Real brendlərin kampaniyaları üzərindən aparılan izahlar mövzunun daha praktik şəkildə mənimsənilməsinə şərait yaradıb.
Təlimdə sosial media platformalarında kontent planlaşdırılması, reklam büdcəsinin idarə olunması və analitik alətlərdən istifadə qaydaları ətraflı izah edilib. Kreativ yanaşma ilə yanaşı, məlumatların düzgün təhlilinin də uğurlu kampaniyanın qurulmasında vacib məqam olduğu diqqətə çatdırılıb.
Təlim interaktiv müzakirələr və sual-cavab sessiyası ilə davam edib.
