BDU-nun üç tələbəsi “AzerGold”un tələbələr üçün elan etdiyi 4-cü təqaüd proqramının qalibi olub
Bakı Dövlət Universitetinin (BDU) 3 tələbəsi “AzerGold” Qapalı Səhmdar Cəmiyyətinin təşkilatçılığı, Elm və Təhsil Nazirliyinin dəstəyi ilə ali və peşə təhsili müəssisələrinin tələbələri üçün elan edilən 4-cü təqaüd proqramının qalibi olub.
Bunlar BDU-nun Geologiya fakültəsinin “Geologiya və geofizika mühəndisliyi” ixtisası üzrə IV kurs tələbələri Tural Murtuzov və Emin Zeynallı, Ekologiya və torpaqşünaslıq fakültəsinin “Ekologiya” ixtisası üzrə IV kurs tələbəsi Günel Hacəliyevadır. Hər üç tələbə dövlət sifarişi əsasında təhsil alır.
“AzerGold” təqaüd proqramı peşə təhsilinin inkişafına töhfə vermək, müvafiq istiqamət üzrə ixtisaslı mütəxəssislər yetişdirmək və onların əmək bazarına uyğunlaşmasına dəstək olmaq məqsədi daşıyır. Sözügedən təqaüd proqramı 2021-ci ildən təsis edilib. 2024/2025-ci tədris ili üzrə 10 universitet və 2 peşə təhsili müəssisəsinin tələbəsi bu təqaüdə layiq görülüb. Bu günədək ümumilikdə ali təhsil üzrə 38, peşə təhsili üzrə isə 37 tələbə proqram çərçivəsində qalib olub və QSC-də istehsalat təcrübəsinə cəlb edilib.
Tələbələrimizi təbrik edir, uğurlarının davamını arzulayırıq!
