BDU-nun şəhid məzunu Erkin Hüseynovun xatirəsi anılıb

first degree 10 October 2025 16:16

Bakı Dövlət Universitetinin (BDU) Tələbə Gənclər Təşkilatının (TGT) təşkilatçılığı ilə Sosial elmlər və psixologiya fakültəsinin şəhid məzunu Erkin Hüseynovun xatirəsinə həsr olunmuş “Qəhrəmanın yolu” adlı tədbir keçirilib.

Əvvəlcə Azərbaycanın ərazi bütövlüyü uğrunda həlak olmuş şəhidlərin əziz xatirəsi bir dəqiqəlik sükutla yad edilib.

Fakültənin sosial məsələlər və tələbələrlə iş üzrə dekan müavini Nəzakət Kərimova, Fəlsəfə kafedrasının müdiri Kəmalə Pənahova, BDU-nun Humanitar məsələlər və gənclər siyasəti şöbəsinin əməkdaşı Ələkbər Həsənov, TGT sədri Harun Mehdiyev, “Narınc” Psixologiya Mərkəzinin əməkdaşı Səbinə Hüseynova, fakültənin TGT fəalları çıxışlarında BDU-nun şəhid məzunu Erkin Hüseynovun qısa, amma şərəfli ömür yolu haqqında söhbət açıblar. Bildiriblər ki, Erkin Hüseynov BDU-nun Sosial elmlər və psixologiya fakültəsində “Fəlsəfə” ixtisası üzrə təhsil alıb. Uşaqlıqdan hərbçi olmaq, Vətənimizin keşiyində dayanmaq Erkin Hüseynovun ən böyük arzusu olub. Ali məktəbi bitirən kimi ordu sıralarına yazılıb, hərbçi olmaq arzusunu həyata keçirib və leytenant rütbəsinə qədər yüksəlib.

Erkin Hüseynov 2022-ci il sentyabrın 12-də Kəlbəcər rayonunda Azərbaycanın ərazi bütövlüyünün bərpa edilməsi uğrunda gedən döyüş əməliyyatlarında iştirak edib. O, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirib, yaralı dostunu xilas edərkən şəhid olub.

Tədbir bədii hissə ilə başa çatıb.