BDU-nun Psixoloji yardım sektoru “Cütlük münasibətlərində manipulyasiya” mövzusunda təlim keçirib
Bakı Dövlət Universitetinin (BDU) Psixoloji yardım sektoru (PYS) tələbələr üçün “Cütlük münasibətlərində manipulyasiya” mövzusunda maarifləndirici təlim keçirib.
Təlimdə müxtəlif fakültələrdən olan tələbələr iştirak ediblər. Psixoloji yardım sektorunun psixoloqu Vasif Bəşirov bildirib ki, manipulyasiya insanın başqalarının duyğularını, düşüncələrini və davranışlarını öz maraqlarına uyğun olaraq gizli və ya aldadıcı şəkildə idarə etməyə çalışmasıdır. O, tələbələrə manipulyasiyanın rast gəlinən əsas növləri, onların fərdi və sosial münasibətlərə təsiri barədə məlumat verib.
Təlimdə ailədaxili münasibətlər, davranışlar, baş verən problemlər geniş təhlil edilib. Qeyd olunub ki, ailədaxili münasibətlərdə səmimiyyət, sevgi, qayğı, qarşılıqlı məsuliyyət fərdlərin fiziki və psixoloji baxımdan sağlam inkişafının əsas şərtidir.
İştirakçılarla münasibətlərdə emosional ehtiyacların insan psixologiyasına və davranışlarına təsiri mövzusunda interaktiv müzakirələr aparılıb.
