BDU-nun professor-müəllim heyəti üçün təlim: “Ənənəvi mühazirədən interaktiv dərsə: müasir tədris metodlarının tətbiqi”
Bakı Dövlət Universitetində (BDU) professor-müəllim heyəti üçün “Ənənəvi mühazirədən interaktiv dərsə: müasir tədris metodlarının tətbiqi” mövzusunda təlim keçirilib.
BDU-nun Tədris prosesinin idarə olunması şöbəsinin müdiri Fərhad Aydınlı tələbələrin informasiya qəbulu və emalı vərdişlərinin dəyişməsi, diqqət və motivasiyanın öyrənməyə təsiri, həmçinin müasir auditoriyanın çağırışları barədə danışıb. Qeyd olunub ki, müəllimin əsas vəzifəsi yalnız məlumat ötürmək deyil, tələbənin analitik düşünməsinə, müzakirələrə qoşulmasına və qərar qəbul etməsinə şərait yaradan dərs mühiti formalaşdırmaqdır.
Sessiya zamanı ənənəvi mühazirə ilə interaktiv dərs modelləri müqayisə edilib, uzunmüddətli passiv dinləmənin tələbə fəallığına mənfi təsirləri müzakirə olunub. 90 dəqiqəlik dərsin fasiləsiz mühazirə əvəzinə kiçik mühazirə, qrup işi, müzakirə və refleksiya mərhələlərindən ibarət formatda qurulmasının üstünlükləri konkret nümunələrlə diqqətə çatdırılıb.
Təlimdə Avropa ölkələri, Türkiyə, İsrail, Yaponiya və Çin universitetlərinin müasir tədris yanaşmalarına da nəzər salınıb. Beynəlxalq təcrübədə klassik mühazirədən tam imtina edilmədiyi, onun tələbəyönümlü metodlarla zənginləşdirildiyi vurğulanıb.
Qeyd edək ki, təlimin növbəti sessiyası oktyabrın 20-də struktur bölmələrin əməkdaşları üçün təşkil olunacaq.
