BDU-nun Jurnalistika fakültəsində tanınmış jurnalist Hacı Hacıyevin 100 illik yubileyi qeyd olunub
Bakı Dövlət Universiteti (BDU), Azərbaycan Mətbuat Şurası və Azərbaycan Jurnalistlər Birliyinin birgə təşkilatçılığı ilə tərcüməçi, publisist, əməkdar jurnalist Hacı Hacıyevin 100 illik yubileyinə həsr olunmuş tədbir keçirilib.
Tədbirin moderatoru, Azərbaycan Jurnalistlər Birliyinin sədri Rəşad Məcid ölkəmizin mətbuat tarixində xüsusi xidmətləri olan Hacı Hacıyevin milli mətbuat ənənələrinə sadiqlik prinsipinin bu gün də qorunduğunu bildirib. Qeyd edib ki, o, Azərbaycan Jurnalistlər İttifaqı İdarə Heyətinin katibi, Azərbaycan Jurnalistlər Birliyinin sədri, 2006-cı ildən isə qurumun fəxri sədri vəzifələrində çalışıb. Onun ədəbi yaradıcılığında bədii tərcümə və publisistika xüsusi yer tutub. “Həsən bəy Zərdabi mükafatı” da məhz Hacı Hacıyevin təşəbbüsü ilə təsis edilib. Prinsipiallığı, qətiyyəti və insanlığı ilə iz qoyan Hacı Hacıyevin xatirəsi hər zaman əziz tutulacaq və anılacaq.
Azərbaycan Jurnalistlər Birliyinin sədri Elçin Şıxlı milli mətbuatın 150 illik yubileyi ərəfəsində medianın inkişafı və ənənələrinin qorunması istiqamətində böyük işlər görmüş Hacı Hacıyevin xidmətlərini qeyd etməyin mənəvi borc olduğunu deyib. Bildirib ki, hələ keçmiş İttifaq dövründə Azərbaycan Jurnalistlər Birliyində millilik məsələsini qabardan Hacı Hacıyevin özü də milli adam, böyük jurnalist idi. Məhz onun təklifi ilə Milli Mətbuat Günü Həsən bəy Zərdabinin “Əkinçi” qəzetinin işıq üzü gördüyü günə uyğun olaraq 22 iyul oldu. Milli mətbuatımız Ümummilli Lider Heydər Əliyevin hakimiyyəti dövründə dövlət qayğısı ilə əhatə olundu, daha da inkişaf etdi.
Jurnalistika fakültəsinin dekanı, dosent Vüqar Əliyev bildirib ki, ölkəmizdəki jurnalist təşkilatlarının fəaliyyəti tədris prosesində tələbələrə öyrədilir. Hacı Hacıyevin uzun illər rəhbərlik etdiyi Azərbaycan Jurnalistlər Birliyinin fəaliyyəti haqqında da “Jurnalistikaya giriş” fənnində geniş məlumat verilir. Gənc jurnalistlər bu təşkilatların məqsədləri, iş prinsipləri ilə tanış olurlar.
Sonra çıxış edən BDU-nun Milli mətbuat tarixi kafedrasının müdiri, professor Cahangir Məmmədli, Multimedia və elektron kommunikasiya kafedrasının müdiri, professor Qulu Məhərrəmli, Ərəb filologiyası kafedrasının müdiri, dosent Vüqar Qaradağlı, Azərbaycan Jurnalistlər Birliyinin sədr müavini Şahin Babayev, Beynəlxalq jurnalistika və informasiya siyasəti kafedrasının professor əvəzi Sabir Məmmədli və Hacı Hacıyevin oğlu Şahin Hacıyev əməkdar jurnalistlə bağlı xatirələrindən söz açıblar.
