BDU nümayəndə heyəti Pakistanın Lahor Universitetinə səfər edib
Bakı Dövlət Universitetinin (BDU) rektoru Elçin Babayevin rəhbərlik etdiyi nümayəndə heyəti Pakistan İslam Respublikasına səfəri çərçivəsində ölkənin aparıcı və böyük ali təhsil müəssisələrindən biri olan Lahor Universitetində rəsmi görüşlər keçirib. Səfərin əsas məqsədi iki universitet arasında akademik, elmi və mədəni sahələrdə əməkdaşlığın gücləndirilməsi olub.
Səfər çərçivəsində BDU-nun rektoru Elçin Babayev Lahor Universitetinin İdarə Heyətinin sədri Üveys Rauf ilə görüşüb. Görüşdə universitetlər arasında elmi-tədqiqat əməkdaşlığının gücləndirilməsi və akademik mübadilə proqramlarının genişləndirilməsi müzakirə olunub. Tərəflər birgə innovativ layihələrin həyata keçirilməsi və ikili diplom proqramlarının yaradılması perspektivlərini nəzərdən keçiriblər. Həmçinin, təhsil və texnologiya sahəsində strateji tərəfdaşlığın inkişaf etdirilməsi barədə razılıq əldə olunub.
Görüş Lahor Universitetinin rektoru Məhəmməd Əşrəfin, rəhbər heyətinin, dekanların, eləcə də ICESCO-nun Baş direktorunun elm və texnologiyalar üzrə müşaviri Məhəmməd Şərifin iştirakı ilə geniş tərkibdə davam edib. Konkret elm və təhsil istiqamətləri üzrə iki universitet arasında strateji tərəfdaşlığın perspektivləri ətrafında müzakirələr aparılıb, birgə qurumların yaradılması, ikili diplom proqramlarının təşkili və digər əməkdaşlıq istiqamətləri nəzərdən keçirilib.
BDU-nun rektoru Elçin Babayev Universitet haqqında təqdimatla çıxış edərək, BDU-nun tarixi, beynəlxalq əməkdaşlıq istiqamətləri, təhsil və elmi nailiyyətləri, o cümlədən gələcək inkişaf planları barədə ətraflı məlumat verib. O, BDU-nun beynəlxalq əməkdaşlığa xüsusi əhəmiyyət verdiyini, Pakistan universitetləri ilə əlaqələrin inkişafının vacibliyini vurğulayıb.
BDU nümayəndə heyəti Lahor Universitetinin idarəetmə strukturu, fakültələri, kampusu, hospitalı, müasir laboratoriyaları və mərkəzləri ilə yaxından tanış olub. Səfər çərçivəsində BDU-nun rektoru Elçin Babayevin Lahor universitetinin müəllim və tələbələri ilə görüşündə təhsil və elmi araşdırmalar sahəsindəki fəaliyyətləri barədə fikir mübadiləsi aparılıb.
Görüşlərin yekunu olaraq Bakı Dövlət Universiteti və Lahor Universiteti arasında anlaşma memorandumu imzalanıb. Bu memorandum universitetlər arasında əməkdaşlığın genişləndirilməsi, birgə elmi tədqiqatların aparılması, professor-müəllim heyətinin və tələbələrin akademik mübadiləsi, eləcə də birgə təhsil proqramlarının həyata keçirilməsini nəzərdə tutur. BDU ilə Lahor Universiteti arasında imzalanmış memorandumun reallaşdırılması istiqamətində konkret addımların atılması planlaşdırılır və bu əməkdaşlığın uzunmüddətli perspektivdə hər iki universitetə mühüm faydalar verəcəyi gözlənilir.
