BDU-da “Zəfərin 44 sütunu” layihəsi başa çatıb
Bakı Dövlət Universitetində (BDU) “YENİ Klub”un təşkilatçılığı ilə keçirilən “Zəfərin 44 sütunu” layihəsi başa çatıb.
Layihənin sonuncu “Zəfərin möhürü” adlı tədbirində əvvəlcə Dövlət himni səsləndirilib, Ümummilli Lider Heydər Əliyevin və Azərbaycanın ərazi bütövlüyü uğrunda həlak olan şəhidlərimizin əziz xatirələri bir dəqiqəlik sükutla yad edilib.
“YENİ Klub”un sədri, Yeni Azərbaycan Partiyası Gənclər Birliyinin İdarə Heyətinin üzvü Asif Əliyev Vətən müharibəsində qazanılmış tarixi Zəfərin hərbi uğurla yanaşı, diplomatik və hüquqi müstəvidə aparılan mübarizənin də nəticəsi olduğunu bildirib. O, beynəlxalq arenada Azərbaycan həqiqətlərinin müdafiəsi istiqamətində həyata keçirilən fəaliyyətin əhəmiyyətini vurğulayıb, gənclərin vətənpərvərlik və dövlətçilik dəyərləri ruhunda yetişməsinin vacibliyini qeyd edib.
Tədbirdə hüquq elmləri doktoru, professor Zahid Cəfərov, BDU-nun Hüquq fakültəsinin dekanı, dosent Zaur Əliyev, multikulturalizm məsələləri üzrə ekspert Rəvan Həsənov və BDU-nun Qərbi Azərbaycan Araşdırmaları Mərkəzinin direktoru Xalid Niyazov, “YENİ Klub”un İdarə Heyətinin üzvü Nuray Talıblı çıxış ediblər.
Çıxışlarda postmünaqişə dövründə Azərbaycanın regional və beynəlxalq müstəvidə sülhün təmin olunması istiqamətində həyata keçirdiyi təşəbbüslər, hüquqi və diplomatik proseslər, multikultural dəyərlər və mədəniyyətlərarası dialoqun rolu müzakirə olunub. Həmçinin müharibədən sonra formalaşan yeni reallıqlar, Qərbi Azərbaycana qayıdış konsepsiyası, tarixi həqiqətlərin beynəlxalq ictimaiyyətə çatdırılması və tarixi irsin bərpası perspektivlərinə toxunulub.
Tədbirin interaktiv hissəsində tələbələrin sualları cavablandırılıb, mövzu ətrafında fikir mübadiləsi aparılıb.
