BDU-da “Yenidən qurulan şəhərlər” mövzusunda “WUF modeli” simulyasiya konfransı
“BDU könüllüləri” təşkilatının təşəbbüsü ilə keçirilən “Şəhərsalma və memarlıq həftəsi” çərçivəsində “Yenidən qurulan şəhərlər” mövzusunda “WUF (Ümumdünya Şəhərsalma Forumu - World Urban Forum) modeli” simulyasiya konfransı keçirilib.
“BDU könüllüləri” təşkilatının layihələrin idarə edilməsi və təşkilatlarla iş üzrə meneceri Mədinə Xəlilova həftə haqqında məlumat verib, simulyasiyanın BMT 2030 Gündəliyi çərçivəsində 9-cu, 11-ci və 17-ci Dayanıqlı İnkişaf Məqsədi uğrunda fəaliyyətin təşviqinə təsirini vurğulayıb. Qeyd edib ki, bu cür təşəbbüslər tələbələrin qlobal problemlər barədə məlumatlılığını artırmaqla yanaşı, onların innovasiya, dayanıqlı şəhər mühiti və beynəlxalq əməkdaşlıq kimi istiqamətlərdə fəal müzakirələr aparmasına və yeni ideyalar irəli sürməsinə imkan yaradır.
Simulyasiya konfransı çərçivəsində iştirakçılar Azərbaycanın müxtəlif şəhərlərini təmsil edərək həmin ərazilərdə aparılan bərpa və yenidənqurma prosesləri, dayanıqlı şəhər inkişafı, müasir infrastruktur həlləri və şəhər planlaşdırılması ilə bağlı məsələlər ətrafında müzakirələr aparıblar. Sessiyalar zamanı şəhərlərin yenidən qurulması prosesində sosial, iqtisadi və ekoloji amillərin təsiri nəzərə alınıb.
Sonra səsləndirilən fikir və təkliflər ümumiləşdirilərək yekun müzakirələr aparılıb.
Konfransın sonunda iştirakçılara sertifikat və təşəkkürnamələr verilib.
