BDU-da tədbir: “Qalib xalqın Zəfər salnaməsi”
Bakı Dövlət Universitetinin (BDU) Şərqşünaslıq fakültəsində Tələbə Gənclər Təşkilatının (TGT) təşəbbüsü ilə 8 Noyabr – Zəfər Gününə həsr olunmuş “Qalib xalqın Zəfər salnaməsi” adlı tədbir keçirilib.
Əvvəlcə Dövlət himni səsləndirilib, Ümummilli Lider Heydər Əliyevin və Azərbaycanın ərazi bütövlüyü uğrunda həlak olan şəhidlərin əziz xatirəsi bir dəqiqəlik sükutla yad edilib.
Şərqşünaslıq fakültəsinin dekanı Aydan Xəndan çıxışında Zəfər Gününün Azərbaycan xalqının tarixindəki xüsusi yerindən bəhs edib. O, 8 Noyabrın milli birliyin, xalqın sarsılmaz iradəsinin, Vətən sevgisinin və qəhrəmanlığının təntənəsi olduğunu vurğulayıb. Dekan bu qələbənin Azərbaycan xalqının yaddaşında əbədi yaşayacağını və gələcək nəsillər üçün qürur mənbəyi olduğunu qeyd edib.
Daha sonra fakültənin məzunu, “Vətən uğrunda” və “Füzulinin azad olunmasına görə” medalları ilə təltif edilmiş şəhid Vüqar Məmmədovun anası Əsmər Məmmədova çıxış edib. O, şəhid ailələrinin yaşadığı ağır mənəvi sınaqlardan, övlad itkisi ilə barışmağın çətinliyindən və şəhidlərin Vətən uğrunda göstərdikləri fədakarlıqdan danışıb. Şəhid anası Vüqar Məmmədovun həyat yolunun, Vətənə bağlılığının və qəhrəmanlığının onun üçün əbədi qürur mənbəyi olduğunu ifadə edib.
Tədbirdə Xüsusi Təyinatlı Qüvvələrin ehtiyatda olan zabiti, Vətən müharibəsi qazisi Vasif Dilavərzadə və Şərqşünaslıq fakültəsinin məzunu, Vətən müharibəsi iştirakçısı, Kəlbəcərin azad olunmasına görə medalı ilə təltif edilmiş qazi Aqil Əsədli çıxış ediblər. Qazilər döyüş yolları, müharibə zamanı qarşılaşdıqları çətinliklər, döyüş yoldaşlarının fədakarlığı və Azərbaycan Ordusunun nümayiş etdirdiyi peşəkarlıq barədə danışıblar.
Tədbirin bədii hissəsində Zəfər Gününə həsr olunmuş videoçarx nümayiş etdirilib, fakültə tələbələri Vətənə, qəhrəmanlığa və Böyük Zəfərə həsr olunmuş şeirlər səsləndiriblər.
