BDU-da Silahlı Qüvvələr Günü qeyd olunub
Bakı Dövlət Universitetinin (BDU) Tarix fakültəsində 26 İyun – Azərbaycan Respublikasının Silahlı Qüvvələri Günü münasibətilə tədbir keçirilib.
Əvvəlcə Dövlət himni səsləndirilib, Ümummilli Lider Heydər Əliyevin və Azərbaycanın ərazi bütövlüyü uğrunda həlak olan şəhidlərimizin əziz xatirələri bir dəqiqəlik sükutla yad edilib.
Tarix fakültəsinin dekanı, professor İbrahim Zeynalov Azərbaycan Silahlı Qüvvələrinin təkcə hərbi güc simvolu deyil, müstəqil dövlətçiliyin, suverenliyin və milli birliyin təcəssümü olduğunu bildirib. Qeyd edib ki, Ulu Öndər Heydər Əliyevin müvafiq Sərəncamı ilə Azərbaycan Xalq Cümhuriyyəti dövründə Əlahiddə Korpusun, yəni Milli Ordunun yarandığı 26 iyun tarixi Azərbaycan Respublikasının Silahlı Qüvvələri Günü elan olunub. Hər il bu tarix rəsmi dövlət bayramı kimi qeyd edilir. Azərbaycana birinci rəhbərliyi dövründə milli hərbi təhsil sisteminin əsasını qoyan Ümummilli Lider Heydər Əliyev onun daha da inkişaf etdirilməsi məqsədilə 1999-cu il yanvarın 20-də Hərbi Akademiyanın yaradılması haqqında Fərman imzalayıb. Ulu Öndərin 2001-ci il 20 avqust tarixli Fərmanı əsasında isə Silahlı Qüvvələr üçün kadr hazırlığının təkmilləşdirilməsi məqsədilə Müdafiə Nazirliyi sistemində fəaliyyət göstərən məktəblər Azərbaycan Ali Hərbi Məktəbi, Azərbaycan Hərbi Dənizçilik Məktəbi və Azərbaycan Ali Hərbi Təyyarəçilik Məktəbi adlandırılıb. Hazırda Azərbaycan Silahlı Qüvvələrinin quruculuğu, təkmilləşdirilməsi və inkişafı prosesi Müzəffər Ali Baş Komandan, Prezident İlham Əliyev tərəfindən uğurla davam etdirilir. Məhz onun dövründə həyata keçirilən təxirəsalınmaz tədbirlər nəticəsində Azərbaycan Ordusu daha da təkmilləşərək yüksək səviyyəyə çatdırılıb. İbrahim Zeynalov qeyd edib ki, 44 günlük Vətən müharibəsində Azərbaycan Ordusu Müzəffər Ali Baş Komandanın rəhbərliyi ilə düşmən üzərində tarixi Zəfər çaldı, işğal olunmuş ərazilərimizi düşməndən azad etdi. Büdcə vəsaiti ildən-ilə artırılan Azərbaycan Silahlı Qüvvələrinin hərbi imkanları daha da genişlənir. Bu gün Azərbaycan ordusu dünyanın ən güclü orduları sırasında yer alır.
Mülki hüquq kafedrasının müdiri, dosent Şükür Yusifov bildirib ki, Azərbaycanın əldə etdiyi Zəfər müasir dövlətçilik tarixində həm hərbi qüdrətin, həm də beynəlxalq hüquqa söykənən ədalətli siyasi mövqenin parlaq təcəssümü kimi qiymətləndirilir. Uzun illər ərzində ölkənin suveren ərazilərinin işğal altında qalması beynəlxalq hüququn fundamental prinsiplərinin, xüsusilə dövlətlərin ərazi bütövlüyü və sərhədlərin toxunulmazlığı prinsiplərinin kobud şəkildə pozulması demək idi. Buna baxmayaraq, Azərbaycan dövləti illər boyu hüquqi müstəvidə ardıcıl və prinsipial siyasət yürüdərək beynəlxalq təşkilatların qəbul etdiyi qərar və qətnamələr vasitəsilə öz haqlı mövqeyini dünya ictimaiyyətinə qəbul etdirməyə nail oldu. Bu dövrdə ölkədə həyata keçirilən məqsədyönlü dövlət siyasəti nəticəsində Azərbaycan Silahlı Qüvvələri regionun ən peşəkar və güclü ordularından birinə çevrilib, maddi-texniki baza, müasir silahlanma sistemi və peşəkar hərbi kadr potensialı əhəmiyyətli dərəcədə gücləndirilib. Ordunun inkişafı yalnız hərbi strategiyanın deyil, dövlətin öz konstitusion hüquqlarını və suverenliyini qorumaq iradəsinin əsas göstəricilərindən biri oldu. 44 günlük Vətən müharibəsi və 2023-cü ildə antiterror əməliyyatı ilə Azərbaycan Ordusu beynəlxalq hüququn Azərbaycana verdiyi legitim müdafiə haqqını praktik müstəvidə reallaşdıraraq tarixi ədalətin bərpasını təmin etdi.
Azərbaycan tarixi (humanitar fakültələr üzrə) kafedrasının müdiri, dosent Azad Rzayev isə qeyd edib ki, dünyada baş verən silahlı münaqişələr, qlobal və regional geosiyasi qarşıdurmalar və çağırışlar fonunda Azərbaycanın müstəqilliyini, təhlükəsizliyini və ərazi bütövlüyünü qorumaq, regionda sülhü və sabitliyi təmin etmək istiqamətində atdığı addımlar qürurvericidir. Bu baxımdan Prezident İlham Əliyevin həyata keçirdiyi düşünülmüş, ardıcıl və balanslaşdırılmış xarici siyasət ölkəmizin beynəlxalq aləmdə mövqelərini gücləndirib, həm regional, həm də qlobal təhlükəsizlik arxitekturasında rolunu artırıb. Prezidentin rəhbərliyi ilə yürüdülən uğurlu diplomatik və hərbi-siyasi fəaliyyət nəticəsində Azərbaycan nəinki öz hərbi gücü ilə torpaqlarını azad edib, həm də ədalətli və uzunmüddətli sülhə nail olmaq üçün təşəbbüskar ölkəyə çevrilib.
Tədbir tələbələrin hazırladığı bədii hissə və qısa filmin nümayişi ilə davam edib.
