BDU-da oxucu məmnunluğu probleminin sosial-fəlsəfi mahiyyəti araşdırılıb
Bakı Dövlət Universitetinin (BDU) İnformasiya və sənəd menecmenti fakültəsində professor-müəllim heyətinin və tələbələrin iştirakı ilə “Oxucu məmnunluğu probleminin sosial-fəlsəfi mahiyyəti” mövzusunda elmi seminar keçirilib. Elmi seminarda BDU-nun Kitabxanaşünaslıq kafedrasının müəllimi Sahibə Əliyeva məruzə edib.
Araşdırmada kitabxana-informasiya xidmətinin komponentləri, akademik kitabxanalarda xidmətin qiymətləndirilməsi, kitabxana xidmətinin keyfiyyətinin artırılması üçün müasir üsullar, kitabxana-informasiya xidmətində oxucu məmnunluğu probleminin sosial-fəlsəfi mahiyyəti, oxucu marağının izlənməsi kimi mühüm istiqamətlər təhlil olunub. Qeyd edilib ki, sosial institut kimi fəaliyyət göstərən kitabxanaların səmərəlilik göstəriciləri oxuculara xidmətin keyfiyyətindən və əlçatanlığından, oxucu məmnunluğunun sistematik qiymətləndirilməsindən bilavasitə asılıdır.
Məruzədə oxucu məmnunluğu probleminin sosial-fəlsəfi mahiyyətinin səmərəlilik meyarlarına təsir edən fəlsəfi amilləri izah olunub, onların kitabxanaşünaslıq tədqiqatlarında tətbiqinin sahənin elmi-nəzəri metodologiyasını zənginləşdirdiyi vurğulanıb. Ölkəmizdə kitabxanaşünaslıq elmi məktəbinin banisi, professor Abuzər Xələfov tərəfindən bu istiqamətdə ciddi araşdırmaların aparıldığı diqqətə çatdırılıb.
Tədqiqatda həmçinin mütaliə mədəniyyətinin formalaşması, onun inkişafına verilən tələblər şərh olunub, mütaliə prosesinin oxucu məmnunluğunun formalaşmasındakı mühüm roluna aydınlıq gətirilib, ənənəvi və elektron resurslardan istifadə zamanı oxucu məmnunluğu prosesləri müxtəlif aspektlərdən qiymətləndirilib.
Elmi seminar müzakirələrlə davam edib.
