BDU-da “Məhkəmə Genom Ekspertiza Simulyasiyası”
-lg.jpg)
Bakı Dövlət Universitetinin (BDU) Biologiya fakültəsində Tələbə Gənclər Təşkilatının (TGT) "Məhkəmə Genom Ekspertiza Simulyasiyası" adlı interaktiv təlim-simulyasiyası keçirilib.
Təlimin məqsədi tələbələrə məhkəmə-genom ekspertizası sahəsində praktiki bilik və bacarıqlar aşılamaq, onları sübutların elmi təhlili prosesinə cəlb etməklə tədqiqat vərdişlərini inkişaf etdirməkdir. İştirakçılara məhkəmə-genetik ekspertizalarda istifadə olunan bioloji və genetik testlər, onların tətbiq sahələri barədə nəzəri məlumatlar təqdim olunub. Sonra komandalar onlara verilən materiallar əsasında tədqiqat və analizlər aparıblar. Sonda komandalar öz işlərinin nəticələrini təqdim ediblər.
Təqdimat mərasimində Biologiya fakültəsinin dekanı Afət Məmmədova, Hüquq fakültəsinin Kriminalistika və məhkəmə ekspertizası kafedrasının müdiri Kamil Səlimov çıxış edərək, bu cür praktiki təlimlərin tələbələrin gələcək peşəkar fəaliyyətində mühüm rol oynadığını vurğulayıblar.
Təlimdə iştirak edən üç komandanın işi münsiflər heyəti tərəfindən yüksək qiymətləndirilib. Münsiflər heyətinin qərarına əsasən, 167A komandası qalib elan olunub və sertifikata layiq görülüb.
-xs.jpg)