BDU-da fəaliyyət göstərən “Yeni klub”un üzvləri Zəfər parkını ziyarət ediblər
Bakı Dövlət Universitetində (BDU) fəaliyyət göstərən “Yeni klub”un üzvləri Zəfər parkını ziyarət ediblər.
Klub üzvləri parkda yaradılan şərait və tarixi qələbəmizin izlərini müxtəlif formalarda əks etdirən abidə kompleksi ilə yaxından tanış olublar. Tələbələrə Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi Zəfərin yaddaşlarda yaşadılması, şəhidlərimizin əziz xatirəsinin əbədiləşdirilməsi məqsədilə yaradılmış Zəfər parkı barədə ətraflı məlumat verilib. Bildirilib ki, ərazisi 10 hektara yaxın olan parkın girişində 44 günlük Vətən müharibəsinin rəmzi kimi hündürlüyü 44 metr, eni 22 metr, sütunlarının sayı 44 olan Zəfər tağı inşa edilib. Torpaqlarımızın azad olunması uğrunda tarixi Qələbəyə gedən yolu, Vətən müharibəsində qəhrəmancasına döyüşmüş əsgər və zabitlərimizin, bütün şəhidlərimizin xatirəsini yaşatmaq məqsədilə parkın ərazisində Zəfər muzeyi də yaradılır.