BDU-da dəyirmi masa: “Hiss və fəaliyyət: duyğuların idarə olunması və fəaliyyətə əsaslanan addımlar”
Bakı Dövlət Universitetinin (BDU) Sosial elmlər və psixologiya fakültəsinin Tələbə Elmi Cəmiyyətinin təşəbbüsü ilə 27 mart – Azərbaycan Respublikasında “Elm günü”nə həsr olunmuş “Hiss və fəaliyyət: duyğuların idarə olunması və fəaliyyətə əsaslanan addımlar” mövzusunda dəyirmi masa keçirilib.
Psixologiya kafedrasının dosenti Yamən Vəliyevanın moderatorluğu ilə keçirilən dəyirmi masada iştirakçılar hisslərin insanın fəaliyyətində, şəxsiyyət kimi formaşmağında aparıcı rol oynadığını qeyd ediblər. Düzgün ifadə olunmayan hisslər davranışa, qərarvermə prosesinə və sosial münasibətlərə birbaşa təsir göstərir, psixoloji problemlərə səbəb olur. Buna görə də insan özünü anlamaqla, hisslərini ifadə etməklə emosional zəkasını gücləndirə və münasibətlərini daha sağlam edə bilər.
Dəyirmi masada hisslərin əxlaqi, intellektual, estetik və psevdohisslər formasında insanların fəaliyyətinə təsiri məsələləri müzakirə edilib. Hisslərin ancaq insanlara məxsus olduğu və onların fəaliyyətini idarə etdiyi fikri də tədbirin xüsusi müzakirə obyektinə çevrilib.
