BDU-da “Bir marşın uzun hekayəsi – Mehmet Akif Ersoy və İstiqlal Marşı” adlı tədbir
Bakı Dövlət Universitetinin (BDU) Şərqşünaslıq fakültəsi və Bakı Yunus Əmrə İnstitutunun birgə təşkilatçılığı ilə “Bir marşın uzun hekayəsi – Mehmet Akif Ersoy və İstiqlal Marşı” adlı tədbir keçirilib.
Tədbir Türkiyə Cümhuriyyətinin müstəqillik simvolu olan İstiqlal Marşının qəbul edilməsinin ildönümü və marşın müəllifi Mehmet Akif Ərsoyun anım günü münasibətilə təşkil edilib.
Əvvəlcə Azərbaycan və Türkiyənin Dövlət himnləri səsləndirilib.
Tədbirdə çıxış edən BDU-nun prorektoru, professor Fərda İmanov Azərbaycan-Türkiyə münasibətlərinin qardaşlıq və dostluq prinsiplərinə əsaslandığını vurğulayıb. O, iki ölkənin tarixi, mədəni və elmi sahələrdə bir-birinə yaxın olduğunu qeyd edərək, Azərbaycan-Türkiyə münasibətlərinin dünya üçün nümunə olduğunu bildirib: “Bizi dilimiz, dinimiz və tariximiz birləşdirir. Ulu Öndər Heydər Əliyevin “Bir millət, iki dövlət” kəlamı, Mustafa Kamal Atatürkün “Azərbaycanın sevinci sevincimiz, kədəri kədərimizdir’’ sözləri bu birliyin əsasını təşkil edir. Türkiyə Azərbaycanın müstəqilliyini tanıyan ilk dövlət olub. 2020-ci ildə Vətən müharibəsi zamanı qardaş Türkiyənin siyasi və mənəvi dəstəyini tam gücü ilə hiss etdik. 2021-ci ildə Şuşada imzalanan Şuşa Bəyannaməsi bu münasibətləri daha da möhkəmləndirdi. BDU hazırda dünyanın 100-dən çox universiteti ilə əməkdaşlıq edir, onların əksəriyyəti Türkiyə universitetləridir”.
Şərqşünaslıq fakültəsinin dekanı Aydan Xəndan Bakı Yunus Əmrə İnstitutunun Azərbaycanda 10 ildən artıqdır fəaliyyət göstərdiyini və bu müddət ərzində fakültə ilə birgə müxtəlif mədəni tədbirlərin təşkilini diqqətə çatdırıb. O, Mehmet Akif Ərsoyun ədəbi mirasının önəmini vurğulayıb: “Hər bir yazıçı özündən sonra əsərləri ilə yaşayır. Mehmet Akif Ərsoy da İstiqlal Marşı ilə daim xatırlanır. Onun ifadələri Azərbaycanın Dövlət himni ilə də səsləşir. Bu, iki xalqın duyğularının bənzərliyini göstərir. Azərbaycan və Türkiyə eyni dili və mədəniyyəti paylaşan xalqlar olaraq qırılmaz bağlarla bir-birinə bağlıdır”.
Bakı Yunus Əmrə İnstitutunun rəhbəri Güvən Çolak iki dövlət arasındakı sıx münasibətlərin əhəmiyyətindən söhbət açıb: “Sərhədlərə baxmayaraq, könül dostluğu həmişə qalır. Buna görə də hər iki ölkənin insanları bir-birinə “qardaş” deyə xitab edir”.
Türkiyəli yazıçı Bəşir Ayvazoğlu, türkoloq, professor Elman Quliyev və tarixçi Telman Nüsrətoğlu İstiqlal Marşının tarixi, bədii və siyasi əhəmiyyətindən danışaraq, onun istiqlal mübarizəsini əks etdirən dəyərli əsər olduğunu söyləyiblər.
Tədbirin sonunda BDU tələbələri Mehmet Akif Ersoyun şeirlərini səsləndiriblər.
