BDU-da “Art terapiya” təlimi
Bakı Dövlət Universitetinin (BDU) Biologiya fakültəsinin Tələbə Gənclər Təşkilatının (TGT) dəstəyi ilə II kurs tələbəsi Fatimə Sadıqzadənin “Art terapiya” adlı təlimi keçirilib.
Əvvəlcə iştirakçılara art terapiya barədə məlumat verilib. Qeyd olunub ki, art terapiya müxtəlif incəsənət və yaradıcılıq sahələrinin müalicə və reabilitasiya məqsədilə istifadə olunmasıdır. Bu üsul insanlara özlərini bədii şəkildə ifadə etmə imkanı verməklə yanaşı, zehni (koqnitiv) və emosional bacarıqlar üzərində də müsbət dəyişikliklər edə bilir. Bu baxımdan art terapiya incəsənətin sistemli şəkildə tətbiq olunması ilə aparılan terapevtik bir metoddur.
Gil vasitəsilə əl işləri hazırlamaq üzrə ixtisaslaşmış Fatimə Sadıqzadə bu sahədəki bilik və bacarığını iştirakçılarla bölüşüb. Təlim boyunca o, gil sənətinin incəliklərini nümayiş etdirib, iştirakçıların fərdi yaradıcılıq potensialını üzə çıxarmağa kömək edib. Açıq havada keçirilən tədbirə müxtəlif fakültələrdən olan müəllim və tələbələr qoşulub. Hazırlanan əl işlərindən ibarət sərgi təşkil olunub.
Tədbirdə Biologiya fakültəsinin I kurs tələbəsi Hacıalı Mirismayıl canlı musiqi ifa edib.
