BDU və Satbayev adına Qazax Milli Texniki Tədqiqat Universitetinin birgə ikili diplom proqramı üzrə magistrantın dissertasiya müdafiəsi keçirilib
Bakı Dövlət Universiteti (BDU) ilə Qazaxıstanın Satbayev adına Qazax Milli Texniki Tədqiqat Universiteti arasında həyata keçirilən “Kimya” ixtisasının “Neft kimyası” ixtisaslaşması üzrə birgə ikili diplom proqramı çərçivəsində magistrantın dissertasiya müdafiəsi keçirilib.
Dissertasiya müdafiəsində hər iki universitetin professor-müəllim heyətinin nümayəndələrindən ibarət ixtisaslaşdırılmış şura iştirak edib. Müdafiə zamanı BDU-nun Kimya fakültəsinin “Neft kimyası” ixtisaslaşması üzrə magistrantı Günel Rüstəmli hər iki universitet tərəfindən təyin olunmuş elmi rəhbərlərin rəhbərliyi altında hazırladığı magistrlik dissertasiyasını təqdim edib, tədqiqatın məqsədi, metodologiyası və əldə olunan nəticələr barədə ətraflı məlumat verib.
Şura üzvləri dissertasiya işini aktuallığı, elmi-nəzəri səviyyəsi və praktik əhəmiyyəti baxımından yüksək qiymətləndiriblər. Müzakirələrin yekununda magistrantın çıxışı qənaətbəxş hesab olunub və Günel Rüstəmlinin dissertasiya müdafiəsi uğurla başa çatıb.
Qeyd edək ki, BDU ilə Satbayev adına Qazax Milli Texniki Tədqiqat Universiteti arasında 2021-ci ildə imzalanmış əməkdaşlıq sazişi əsasında həyata keçirilən və ingilis dilində tədris olunan birgə ikili diplom proqramı yüksəkixtisaslı neft kimyası mütəxəssislərinin hazırlanmasına xidmət edir. Proqram tələbələrə hər iki ali təhsil müəssisəsinin akademik və elmi potensialından yararlanmaq, beynəlxalq təcrübə qazanmaq və əmək bazarının tələblərinə cavab verən peşəkar kimyaçı kimi formalaşmaq imkanı yaradır.
