BDU-nun tələbələri logistika sahəsində təcrübə proqramına qoşulub
166 Yükdaşıma və Logistika şirkəti üç ildir ki, ardıcıl olaraq “166 Logistika Akademiyası” təcrübə proqramını həyata keçirir. Bu dəfə seçim mərhələlərində iştirak edən 714 nəfərdən 52 gənc üç aylıq təcrübə proqramına qəbul edilib. Qəbul olunanlar arasında Bakı Dövlət Universitetinin 9 məzunu da var.
İştirakçılar bakalavr və magistr dərəcəsi üzrə təhsil alan gənclər arasından seçilib. “166 Logistika Akademiyası” yay təcrübə proqramında iştirak hüququ qazananlar şirkətin əsas departamentlərində yer alaraq peşəkar əməkdaşlar tərəfindən logistika və nəqliyyat, satış, marketinq və biznesin inkişafı, maliyyə, mühasibatlıq, insan resursları və s. sahələrdə praktiki, eyni zamanda nəzəri bilik və bacarıqlara yiyələnəcəklər.
Qeyd edək ki, təcrübə müddətində öz peşə bacarıqlarını uğurla nümayiş etdirən namizədlər “166 Yükdaşıma və Logistika” şirkətinin müvafiq departamentlərində əmək funksiyalarının icrasını davam etdirəcəklər.
2019-cu ildən etibarən keçirilən “166 Logistika Akademiyası” təcrübə proqramına ümumilikdə 4200-dən artıq müraciət qeydə alınıb və bu müraciətlərdən bütün mərhələləri uğurla keçən 153 nəfər təcrübə proqramına qəbul olunub.