BDU-nun rumıniyalı doktorantı: “Azərbaycan çox təhlükəsiz ölkədir, insanları qonaqpərvərdir”
Alexandra Stefania Dinulescu Bakı Dövlət Universitetinin (BDU) Beynəlxalq münasibətlər və iqtisadiyyat fakültəsinin rumıniyalı doktorantıdır. Bakalavr təhsilini Rumıniyanın Kraiova Universitetində, magistr təhsilini isə Kraiova və Çex Respublikasının Praqa Metropolitan universitetlərində alıb. Hökumətlərarası Təqaüd Proqramı (HTP) çərçivəsində Azərbaycanda, BDU-da təhsil almaq şansı əldə edən Alexandra Stefania bunun akademik inkişafında mühüm rol oynayacağına əmindir:
- Azərbaycanda təhsil almaq qərarını necə verdiniz?
- Azərbaycanın təhsil sistemi mənə çox cəlbedici göründü. Ölkənizin müxtəlif sahələr, o cümlədən elmi tədqiqatlar üzrə inkişafına diqqət yetirəndən sonra burada təhsil almaq, Azərbaycan mədəniyyətini öyrənmək qərarını verdim. Bu ölkədəki təhsil mühiti, BDU-nun beynəlxalq reytinqlərdəki sıralaması, elmi-tədqiqat imkanlarının genişliyi məni daha da həvəsləndirdi.
- BDU-da ilk təhsil ilinizi necə dəyərləndirirsiz?
- Unudulmaz anlarla dolu il oldu. Çoxlu dostlar qazanmışam. Səmimi mühitdə təhsil almaq, buradakı insanlarla və tələbə yoldaşlarımla qurduğum əlaqələr mənim üçün çox dəyərlidir. Hazırda BDU-nun "Tələbə evi"ndə qalıram. Orda tələbələr üçün yaxşı şərait yaradılıb. Otaqlar geniş və rahatdır. Ümumi otaqlarda həm xarici, həm də yerli tələbələrlə maraqlı vaxt keçiririk. Geniş kitabxanada elmlə məşğul olmaq üçün münbit şərait var. Burda olmaqdan xoşbəxtəm.
- Hazırda hansı mövzu üzrə tədqiqat aparırsınız?
- Hazırda milli təhlükəsizliyin artırılmasında enerji və iqtisadi diplomatiyanın rolu, Rumıniya və Azərbaycanın strateji tərəfdaşlıqlarının səmərəliliyə təsiri üzərində araşdırmalar aparıram. Bu tədqiqatda enerji sahəsindəki əməkdaşlığın, iqtisadi diplomatiyanın və geosiyasi əlaqələrin iki ölkənin milli təhlükəsizliyinə necə təsir etdiyini öyrənirəm. Məqsədim Azərbaycan və Rumıniya arasında daha möhkəm əlaqələr qurulmasına kömək etmək və bu sahədə töhfə verməkdir. Bununla yanaşı, Azərbaycanla bağlı daha dərin və müfəssəl araşdırmalar aparmağı düşünürəm.
- Azərbaycan mədəniyyəti ilə necə uyğunlaşdınız?
- Azərbaycan mədəniyyəti ilə ilk tanışlığım, milli adət-ənənələri öyrənmək çox maraqlı idi. Novruz bayramını xüsusi qeyd etmək istəyirəm. Novruz şirniyyatları çox dadlıdır. Bayram ərəfəsindəki çərşənbələr, adətlər çox diqqətimi çəkdi.
- Azərbaycanla bağlı ən çox sevdiyiniz məqam hansıdır?
- Azərbaycan çox təhlükəsiz ölkədir, insanları qonaqpərvərdir. Bu xüsusiyyətlər mənim daha tez uyğunlaşmağımda, buranı ikinci Vətənim kimi hiss etməyimdə mühüm rol oynadı. Azərbaycanın təbiəti, mətbəxi və insanları əvəzolunmazdır.
- Azərbaycan və Rumıniya arasında əlaqələrin gələcəyini necə görürsünüz?
- Ölkələrimiz arasında əlaqələrin gələcəyinə çox ümidlə baxıram. Həm iqtisadiyyat, həm də mədəniyyət sahələrində iki ölkə arasında əlaqələr daha da dərinləşə bilər. Xüsusilə enerji, ticarət və turizm sahələrində daha çox əməkdaşlıq və təcrübə mübadiləsi faydalı olardı. Bu əlaqələrin inkişafı həm regional, həm də beynəlxalq səviyyədə ölkələrimiz üçün böyük imkanlar yarada bilər.
- Gələcəklə bağlı hansı planlarınız var?
- Akademik fəaliyyətlə məşğul olmaq istəyirəm. Rumıniyaya qayıtdıqdan sonra Azərbaycan mədəniyyətini daha yaxşı tanıtmaq, ölkələrimiz arasında əlaqələrin inkişafına dəstək vermək niyyətindəyəm.
Müsahibəni hazırladı: Nərminə Əsədova
