BDU Koreyanın Handong Qlobal Universiteti ilə əməkdaşlığa başlayır
Bakı Dövlət Universiteti (BDU) və Koreyanın Handong Qlobal Universiteti arasında əməkdaşlığa dair anlaşma memorandumu imzalanıb.
Sənədi BDU-nun rektoru Elçin Babayev və Handong Qlobal Universitetinin rektoru Dosoung Choi imzalayıb.
Memorandum hər iki universitetin nəzdində fəaliyyət göstərən fakültə, institut və kolleclərdə təlim-tədris prosesinin təkmilləşdirilməsi və beynəlxalq standartlara uyğunlaşdırılması məqsədilə birgə layihələrin həyata keçirilməsini nəzərdə tutur. Bu çərçivədə konfrans, sərgi, seminar, simpozium, qısamüddətli kurslar və təlimlərin təşkili, ortaq elmi-tədqiqatların aparılması planlaşdırılır.
Sənəddə həmçinin elmi jurnallarda birgə nəşrlər, ortaq akademik proqramların, tədris planlarının və sillabusların hazırlanması, təlimlərin keçirilməsi, akademik və inzibati heyətin, tələbələrin, magistrantların, doktorantların və tədqiqatçıların qarşılıqlı mübadiləsi kimi məsələlər əksini tapıb.
Əsası 1994-cü ildə qoyulmuş Handong Qlobal Universiteti QS Dünya Universitetləri Reytinqində 2025-ci il üzrə 581-600 yerlər arasında qərarlaşıb.