BDU-da “Psixoloji davamlılıq” mövzusunda təlim
Bakı Dövlət Universitetinin (BDU) Psixoloji yardım sektoru və Tətbiqi riyaziyyat və kibernetika fakültəsi tələbələr üçün “Psixoloji davamlılıq” adlı təlim təşkil edib.
Təlimin əsas məqsədi tələbələrdə psixoloji rifahın gücləndirilməsi, stresin idarə olunması, emosiyaların tənzimlənməsi və çətin həyat situasiyalarında dayanıqlı davranış modellərinin formalaşdırılması istiqamətində praktiki biliklərin artırılması olub.
Sektorun psixoloqu Vasif Bəşirov psixoloji davamlılığın əsas komponentləri haqqında məlumat verib. O, özünü tanıma, müsbət düşüncə, sosial dəstəyin əhəmiyyəti, Universitet resurslarından səmərəli istifadə, problemlərin həllində çevik yanaşma və özünə qayğı strategiyaları kimi mövzuları ətraflı izah edib.
Təlim zamanı real həyatdan nümunələr əsasında müzakirələr aparılıb, tələbələrin sualları cavablandırılıb və psixoloji davamlılığın gündəlik həyatda tətbiqi ilə bağlı tövsiyələr verilib.
