BDU-da professor Akif Rüstəmovun 85 illik yubileyinə həsr olunmuş dəyirmi masa keçirilib
Bakı Dövlət Universitetinin (BDU) Jurnalistika fakültəsinin Yeni media və kommunikasiya nəzəriyyəsi kafedrasının professoru Akif Rüstəmovun 85 illik yubileyinə həsr olunmuş “Çağdaş media təhsili: nəzəriyyədən təcrübəyə” adlı dəyirmi masa keçirilib.
Yeni media və kommunikasiya nəzəriyyəsi kafedrasının müdiri, dosent Xatirə Hüseynova Akif Rüstəmovun fəaliyyətinin 55 yaşlı Jurnalistika fakültəsi ilə yaşıd olduğunu deyib. O qeyd edib ki, yüksək insani keyfiyyətlərə malik Akif Rüstəmov 10 ilə yaxın müddətdə Jurnalistika fakültəsinin dekanı işləyib, daim tələbələrin hamisi, dostu kimi tanınıb: “Ömrünü gənc jurnalistlərin peşə hazırlığına həsr etmiş Akif müəllim həm tələbələrin, həm də fakültə kollektivinin çox sevdiyi, hörmət etdiyi bir insandır. Onun tələbələrə münasibəti təkcə müəllim - tələbə münasibəti deyil, övlad münasibətidir. Yüksək peşəkarlıq, sadəlik, xeyirxahlıq və dürüstlük Akif müəllimin pedaqoq kimi əsas cəhətləridir”.
Milli mətbuat tarixi kafedrasının müdiri, professor Cahangir Məmmədli Akif Rüstəmovun fakültənin böyük ustadları Nəsir İmanquliyev, Şirməmməd Hüseynov tərəfindən əsası qoyulan təmizlik ənənələrinə sadiq insan adlandırıb. Qeyd edib ki, jurnalistikanın nəzəriyyəsi ilə bağlı çoxsaylı araşdırmaları, elmi məqalələri və kitabları olan Akif Rüstəmov bu biliklərin tələbələrə aşılanması istiqamətində böyük səy göstərib: “Professorun saxta xəbərlərin aşkara çıxarılması, araşdırılması və mediada etik prinsiplərə riayət olunması ilə bağlı araşdırmaları bu gün də gənc jurnalistlərin köməyinə yetir. Ömrünün yarım əsrdən artıq bir dövrünü Azərbaycan jurnalistikasının inkişafına və bu sahədə peşəkar kadr hazırlığına həsr etmiş Akif müəllimə bundan sonrakı fəaliyyətində uğurlar arzulayıram”.
Daha sonra Akif Rüstəmovun həyat yoluna həsr olunmuş videoçarx nümayiş etdirilib.
Jurnalistika fakültəsinin dekanı Vüqar Əliyev, Multimedia və elektron kommunikasiya kafedrasının müdiri Qulu Məhərrəmli, Azərbaycan Mətbuat Şurası Ahıl Jurnalistlər Məclisinin rəhbəri Tahir Aydınoğlu, “Yeni Azərbaycan” qəzetinin baş redaktoru Alqış Musayev, Bakı Mühəndislik Universitetinin tərbiyə işləri üzrə prorektoru Bayram Hüseynzadə, yazıçı-publisist İlqar Rəsul, Azərbaycan Mətbuat Şurası sədrinin müavini Səadət Məmmədova, BDU-nun İctimaiyyətlə əlaqələr və informasiya şöbəsinin müdiri Kəmalə Quliyeva, Jurnalistika fakültəsinin elmi işlər üzrə dekan müavini Sevinc Əliyeva, Multimedia və elektron kommunikasiya kafedrasının professoru Allahverdi Məmmədli, Yeni media və kommunikasiya nəzəriyyəsi kafedrasının dosenti Zaur Babayev, Əməkdar jurnalist Namiq Əhmədov, fakültənin məzunu Əsgər İsmayılov Akif Rüstəmovun elmi-pedaqoji fəaliyyətinə nəzər salıb, xatirələrini bölüşüblər.
