BDU-da nanohissəciklərin canlı aləmə təsiri müzakirə olunub
Bakı Dövlət Universitetinin (BDU) Fizika fakültəsində “Nanohissəciklərin bitki və heyvan orqanlarında hərəkəti, lokalizasiyası və eliminasiyası” mövzusunda elmi seminar keçirilib.
Seminarda Nanomaterialların kimyəvi fizikası kafedrasının dosenti, Nanoaraşdırmalar Elmi-tədqiqat laboratoriyasının aparıcı elmi işçisi İsmət Əhmədov məruzə edib.
Məruzəçi müxtəlif nanohissəciklərin bitki və heyvan orqanlarında yerləşməsi və xaric olunması barədə məlumat verib. Qeyd edilib ki, nanohissəciklərin torpaqda yayılması, kök vasitəsilə və ya toxumlara nüfuz etməklə bitkilərin yerüstü orqanlarına, qida prosesində isə heyvanların orqanizminə düşməsi zəncirvari prosesdir. Bu prosesin hər sonrakı mərhələsində nanohissəciklərin miqdarı azalır. Əsas məsələlərdən biri də orqanizmə daxil olmuş nanohissəciklərin eliminasiyası, yəni xaric olunması məsələsidir. Tədqiqatların əsas məqsədlərindən biri də nanohissəciklərin təbiətdə yayılmasının canlı orqanizmlər və son nəticədə insanlar üçün nə qədər riskli olmasını müəyyən etməkdir. İsmət Əhmədov hazırda nanohissəciklərin tibb sahəsində uğurla tətbiq edildiyini, bu işlərin ərzaq istehsalında da öyrənilməsinin zəruriliyini nəzərə çatdırıb.
