BDU-da gənclər təşkilatlarının üzvlərinə liderlik və idarəetmə bacarıqları üzrə təlim keçilib
Bakı Dövlət Universitetinin (BDU) Keyfiyyət Təminatı Mərkəzinin təşkilatçılığı ilə “YENİ” klub, Tələbə Həmkarlar İttifaqı Komitəsi, Tələbə Elmi Cəmiyyəti və “BDU könüllüləri” təşkilatının üzvləri üçün “Liderlik və idarəetmə bacarıqları” mövzusunda təlim keçirilib.
BDU rektorunun keyfiyyət təminatı üzrə müşaviri Asiman İlyasov tərəfindən keçirilən təlimin əsas məqsədi tələbələrin liderlik potensialının üzə çıxarılması, idarəetmə bacarıqlarının inkişaf etdirilməsi, komanda ilə işləmək, düzgün qərar qəbul etmək və effektiv ünsiyyət qurmaq vərdişlərinin formalaşdırılması olub.
Təlim zamanı liderliyin əsas prinsipləri, müasir idarəetmə yanaşmaları, komanda işinin təşkili, məsuliyyət bölgüsü və problemlərin həlli yolları haqqında məlumat verilib. İştirakçılar liderlik və idarəetmə bacarıqlarının tələbə təşkilatlarının fəaliyyətində, eləcə də gələcək peşəkar inkişafda rolunu müzakirə ediblər.
İnteraktiv formatda keçirilən təlim tələbələrin fikir mübadiləsi aparmasına, praktiki biliklərini artırmasına və şəxsi inkişaf istiqamətlərini müəyyənləşdirməsinə imkan yaradıb.
BDU-nun Keyfiyyət Təminatı Mərkəzi tərəfindən təşkil olunan bu kimi təlimlər tələbələrin fərdi və peşəkar inkişafının dəstəklənməsinə, onların təşəbbüskarlıq və liderlik keyfiyyətlərinin gücləndirilməsinə, universitet həyatında fəal iştiraklarının təşviqinə xidmət edir.
