BDU-da “Gənclər Dayanıqlı İnkişaf Məqsədləri naminə” Gənclərin III Şəbəkələşmə Forumu keçirilib
Bakı Dövlət Universiteti (BDU), "BDU könüllüləri" təşkilatı və “SDG Youth Community” Təşəbbüs Qrupunun təşkilatçılığı ilə “Gənclər Dayanıqlı İnkişaf Məqsədləri naminə” Gənclərin III Şəbəkələşmə Forumu keçirilib.
Forumun açılışında çıxış edən BDU rektorunun keyfiyyət təminatı üzrə müşaviri Asiman İlyasov dayanıqlı inkişafın təmin olunmasında ali təhsil müəssisələrinin və gənclərin rolundan bəhs edib, bu istiqamətdə universitetlərin üzərinə düşən vəzifələrə diqqət çəkib. O, gənclərin innovativ yanaşmaları, təşəbbüskarlığı və müxtəlif sahələr üzrə əməkdaşlığa açıq olmasının BMT-nin Dayanıqlı İnkişaf Məqsədlərinin (DİM) həyata keçirilməsinə mühüm töhfə verdiyini vurğulayıb.
Layihənin rəhbəri Anar Vəliyev, “SDG Youth Forum II” layihəsinin rəhbəri Nigar İsgəndərova, Dövlət Ekoloji Ekspertiza Agentliyinin Rəy və icazələrin icrasının monitorinqi şöbəsinin müdiri Gülab Bünyatov və Dövlət Statistika Komitəsinin Dayanıqlı inkişaf statistikası şöbəsinin baş məsləhətçisi Ramilə Soltanova çıxışlarında DİM-lərin həyata keçirilməsində gənclərin rolunun artırılması, təhsil və institusional əməkdaşlığın əhəmiyyəti barədə fikirlər səsləndiriblər.
Forumda “Dayanıqlı şəhərlər üçün yeni baxış və yerli həllər” mövzusunda panel müzakirəsi keçirilib. Müzakirədə Dövlət Şəhərsalma və Arxitektura Komitəsinin Şəhərsalma və ərazilərin inkişafı şöbəsinin müdir müavini Şahnaz Bədəlova, Bakı Mühəndislik Universitetinin professoru, Memarlıq və şəhərsalma kafedrasının müdiri Sabir Orucov və “FounderDNA”nın təsisçisi, jurnalist Ayfra Manto iştirak ediblər.
Panel zamanı dayanıqlı şəhərlərin formalaşdırılmasında müasir şəhərsalma yanaşmaları, şəhərlərin sosial, iqtisadi və ekoloji ehtiyaclara uyğun inkişaf etdirilməsi, yerli xüsusiyyətləri nəzərə alan həllərin tətbiqi və şəhər mühitində innovativ yanaşmaların rolu müzakirə olunub. Bununla yanaşı, şəhər planlaşdırılmasında əhalinin ehtiyaclarının nəzərə alınması, ictimai məkanların inkişaf etdirilməsi, şəhərlərin əlçatan və yaşamaq üçün əlverişli mühitə çevrilməsi məsələlərinə toxunulub.
Müzakirədə şəhərlərin inkişafında yalnız infrastrukturun deyil, insan amilinin də əsas meyarlardan biri olduğu vurğulanıb. Panel iştirakçıları dayanıqlı şəhər modelinin formalaşdırılmasında dövlət qurumları, ali təhsil müəssisələri, özəl sektor və vətəndaş cəmiyyəti arasında əməkdaşlığın əhəmiyyətindən bəhs ediblər.
Forumun növbəti panel sessiyası “Gələcəyin dayanıqlı şəhərləri: Yaşıl transformasiya, inklüziv icmalar və birgə şəhər inkişafı” mövzusuna həsr olunub. Paneldə Kolumbiya Universitetinin Sabin İqlim Dəyişikliyi Hüququ Mərkəzində qlobal iqlim sahəsində məhkəmə işləri üzrə milli məruzəçi Sadiqə Mehdiyeva, “Venetian Plaster Art” şirkətinin həmtəsisçisi və direktoru Anna Shvygar, “Worley” şirkətinin ətraf mühit və sosial məsələlər üzrə meneceri Rahid Abbasov və “BDU könüllüləri” təşkilatının baş katibi Qasım Xəlilov çıxış ediblər.
Panel müzakirəsində yaşıl transformasiya, ətraf mühitin qorunması, şəhərlərin iqlim dəyişmələrinə adaptasiyasında ekoloji siyasətin rolu, inklüziv icmaların formalaşdırılması, sosial və ekoloji davamlılıq, eləcə də beynəlxalq münasibətlər kontekstində dayanıqlı inkişaf məsələləri ətrafında geniş fikir mübadiləsi aparılıb.
Məruzəçilər təmsil etdikləri sahələr üzrə təcrübələrini və strateji yanaşmalarını iştirakçılarla bölüşüb, dayanıqlı şəhər inkişafında dövlət, özəl sektor, vətəndaş cəmiyyəti və gənclər arasında əməkdaşlığın əhəmiyyətini vurğulayıblar.
Sessiyanın sonunda iştirakçıların sualları cavablandırılıb.
