BDU-da Azərbaycan şəhərlərinin sosial-iqtisadi və demoqrafik inkişaf problemləri araşdırılır
Bakı Dövlət Universitetinin (BDU) Coğrafiya fakültəsinin rəhbərliyi və Tələbə Gənclər Təşkilatının (TGT) təşkilatçılığı ilə 2026-cı ildə Bakıda keçiriləcək BMT-nin Ümumdünya Şəhərsalma Forumunun 13-cü sessiyası (WUF13) ərəfəsində “Azərbaycan şəhərlərinin davamlı sosial-iqtisadi və demoqrafik inkişaf xüsusiyyətləri” mövzusunda elmi seminar keçirilib.
Coğrafiya fakültəsinin dekanı, professor Məqsəd Qocamanov qloballaşan dünyada şəhərlərin inkişafının davamlı idarə olunmasının əhəmiyyətindən bəhs edib. O, tələbələrin urbanizasiya mövzusunda biliklərinin artırılmasının vacibliyini vurğulayıb və WUF-13 çərçivəsində keçirilən tədbirlərin onların elmi dünyagörüşünün, şəhərsalma proseslərinə baxış bucağının daha da genişlənəcəyinə əminliyini ifadə edib.
Seminarda Azərbaycan coğrafiyası və coğrafiyanın tədrisi metodikası kafedrasının müəllimi, dosent Etibar Bədəlov məruzə ilə çıxış edib. O, şəhərlərin sosial-iqtisadi inkişafını müəyyən edən amillərin elmi-praktik əsaslarını izah edərək, ölkənin şəhər sistemi üzrə demoqrafik proseslər haqqında məlumat verib. Məruzədə urbanizasiya dinamikası, şəhər mühitinə düşən ekoloji yük, miqrasiya axınlarının şəhər infrastrukturuna təsiri faktlar və statistik göstəricilər əsasında təqdim olunub. Etibar Bədəlov vurğulayıb ki, davamlı inkişaf yalnız iqtisadi göstəricilərlə deyil, həm də sosial rifah, ekoloji tarazlıq və şəhər mühitinin adaptiv idarə edilməsi prinsipləri ilə təmin olunur.
Sonda mövzu ətrafında suallar cavablandırılıb və şəhərsalma proseslərinin gələcək perspektivləri müzakirə edilib.
